ବଲାଙ୍ଗୀର: ବନ୍ୟାକୁ ବିତି ଯାଇଛି ତିନି ମାସ । ଏହା ଭିତରେ ମାଳ ମାଳ ମନ୍ତ୍ରୀ ବନ୍ୟା ଅଞ୍ଚଳ ପରିଦର୍ଶନ କରି ଫେରି ଯାଇଛନ୍ତି । ହେଲେ ଏପର୍ଯ୍ୟନ୍ତ ମଧ୍ୟ ଘୋଷଣା କରାଯାଇନାହିଁ ବନ୍ୟା କ୍ଷତିପୂରଣ । ଯାହାକୁ ନେଇ ସୋମବାର ଗଣଧାରଣା ଦେଇଛି କୋଶଳ ସମନ୍ବୟ କମିଟି । ବନ୍ୟା ପାଇଁ ବଲାଙ୍ଗୀର ଜିଲ୍ଲାକୁ 1000 କୋଟି ଟଙ୍କା ସହାୟତା ଦେବାକୁ ଦାବି ପତ୍ରରେ ଉଲ୍ଲେଖ ରଖିଛି କମିଟି ।
କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜେ ଆସି ବନ୍ୟା ସମୀକ୍ଷା କରି ଫେରିଥିବା ବେଳେ ରାଜ୍ୟ ସରକାରଙ୍କର ମଧ୍ୟ ଦୁଇ ମନ୍ତ୍ରୀ ସମାନ ଢଙ୍ଗରେ ବନ୍ୟାର ସମୀକ୍ଷା କରି ଫେରି ଯାଇଛନ୍ତି । କିନ୍ତୁ ଏଯାଏଁ ଜିଲ୍ଲା ପାଇଁ ତଥା ବନ୍ୟା ପ୍ରଭାବିତ ଲୋକଙ୍କ ପାଇଁ କୌଣସି ପ୍ୟାକେଜ ଘୋଷଣା କରାଯାଇନାହିଁ ।
କ୍ଷତିପୂରଣ ଶୀଘ୍ର ଘୋଷଣା ଦାବିରେ କୋଶଳ ସମନ୍ବୟ କମିଟି ଜିଲ୍ଲାପାଳଙ୍କ ମୁଖ୍ୟ କାର୍ଯ୍ୟାଳୟ ସମ୍ମୁଖରେ ଏହି ଧାରଣା ଦେଇଥିଲା । ବନ୍ୟା ପାଇଁ ବଲାଙ୍ଗୀର ଜିଲ୍ଲାକୁ 1000 କୋଟି ଟଙ୍କା ସହାୟତା ଦେବାକୁ ଦାବି କରିଛି । ଏହା ସହ କୃଷି ଋଣ ଛାଡ ତଥା ସ୍କୁଲ କଲେଜରେ ଛାତ୍ର ଛାତ୍ରୀଙ୍କ ଫିସ ଛାଡ଼ କରିବାର ଦାବି ମଧ୍ୟ ଜଣାଇଛି କମିଟି । ଦାବି ପୂରଣ ନହେଲେ ଆଗାମୀ ଦିନରେ ଆନ୍ଦୋଳନ ତୀବ୍ରତର ହେବ ବୋଲି କହିଛି କୋଶଳ ସମନ୍ବୟ କମିଟି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
