ବଲାଙ୍ଗୀର: ଦୀର୍ଘଦିନ ଧରି ଚାଲିଥିବା ସେକ୍ସ ରାକେଟର ପର୍ଦ୍ଦାଫାଶ କରିଛନ୍ତି ଗ୍ରାମବାସୀ । ଉକ୍ତସ୍ଥାନରେ ଚଢାଉ କରି ଜଣେ ଯୁବତୀଙ୍କ ସହ 3 ଜଣ ଗ୍ରାହକଙ୍କୁ କାବୁ କରିବା ସହ ପୋଲିସରେ ଜିମା ଦେଇଛନ୍ତି ସେମାନେ । ତେବେ ପୋଲିସ ସମସ୍ତଙ୍କୁ ଗିରଫ କରିବା ସହ ମୁଖ୍ୟ ଅଭିଯୁକ୍ତଙ୍କୁ ଧରିବା ପାଇଁ ତଦନ୍ତ ଆରମ୍ଭ କରିଛି । ବଲାଙ୍ଗୀର ଜିଲ୍ଲା ପୁଇଁତଲା ବ୍ଲକ ବୁରୋ ବହାଡ଼ି ଗ୍ରାମରେ ଦେଖିବାକୁ ମିଳିଛି ଏଭଳି ଘଟଣା ।
ବୁରୋ ବହାଡ଼ି ଗ୍ରାମର ଏକ ଘରେ ଦୀର୍ଘ ଦିନରୁ ଏହି ରାକେଟ ଚାଲିଥିବା ବେଳେ ଏହାକୁ ବନ୍ଦ କରିବାକୁ ଅନେକ ଥର ତାଗିଦ କରିଥିଲେ ଗ୍ରାମବାସୀ । ହେଲେ ଏହା ବନ୍ଦ ହୋଇନଥିଲା । ଶେଷରେ ଗ୍ରାମବାସୀ ଏକଜୁଟ ହୋଇ ସେହି ଘରେ ଚଢ଼ାଉ କରିଥିଲେ। ଚଢାଉ ବେଳେ ଜଣେ ଯୁବତୀ ସହ ତିନି ଜଣ ଗ୍ରାହକଙ୍କୁ କାବୁ କରି ଗାଁ ମଝିରେ ଏକ ଖୁଣ୍ଟରେ ବାନ୍ଧି ରଖିଥିଲେ । ପରେ ପୁଇଁତଲା ପୋଲିସ ଘଟଣାସ୍ଥଳକୁ ଯାଇ ସମସ୍ତ ଅଭିଯୁକ୍ତଙ୍କୁ ଗିରଫ କରିଥିଲା ।
ତେବେ ଘଟଣାସ୍ଥଳରୁ ପୋଲିସ ତିନୋଟି ମୋଟର ସାଇକଲ, ତିନୋଟି ମୋବାଇଲ ଓ ବିଭିନ୍ନ ଆପତ୍ତିଜନକ ଔଷଧ ଜବତ କରିଥିଲା। ଗିରଫ ପରେ ତିନି ଜଣ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି । ସେହିପରି ଯୁବତୀ ଜଣକ ସମ୍ବଲପୁରର ହୋଇଥିବା ବେଳେ ତାଙ୍କୁ ବଲାଙ୍ଗୀର ସ୍ବଧାର ଗୃହରେ ରଖା ଯାଇଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
