ବଲାଙ୍ଗୀର: ଜଣାଶୁଣା ସିନେମା ନିର୍ମାତା ତଥା ନିର୍ଦ୍ଦେଶକ ସବ୍ୟସାଚୀ ମହାପାତ୍ରଙ୍କ ନୂଆ ସିନେମା ‘ଶଲା ବୁଢାର ବଦଲା’ ଶୁକ୍ରବାର ରିଲିଜ ହୋଇଛି । ଭିନ୍ନ ଏକ କାହାଣୀ ତଥା ଲୋକ ସଂସ୍କୃତିକୁ ନେଇ ତିଆରି ଏହି ସିନେମା ବେଶ ସଫଳ ଓ ଲୋକପ୍ରିୟ ହେବ ବୋଲି ସମସ୍ତେ ଆଶା କରିଛନ୍ତି ।
ଏହି ସିନେମାରେ ମୁଖ୍ୟ ଭୂମିକାରେ 90 ବର୍ଷୀୟ ଅଟଳ ବିହାରୀ ପଣ୍ଡା ଥିବାବେଳେ ବାକି ସବୁ ନବାଗତା ଅଭିନେତା ଓ ଅଭିନେତ୍ରୀ ଅଛନ୍ତି। ସେମାନେ ଖୁବ ପରିଶ୍ରମ କରିଥିବାବେଳେ ଲୋକେ ତାଙ୍କ ଅଭିନୟକୁ ପସନ୍ଦ କରିବେ ବୋଲି ଆଶା ରଖିଛନ୍ତି । ସେହିପରି ଏହି ସିନେମାରେ ଡ୍ରାମା, କମେଡି ଓ ସୁନ୍ଦର କାହାଣୀ ଲୋକ ପସନ୍ଦ କରିବେ ବୋଲି ଏମାନେ କହିଛନ୍ତି। ଏହି ସିନେମାର ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ସଙ୍ଗୀତ ନିର୍ଦେଶକ ତଥା ଗାୟକ ପଙ୍କଜ ଜାଲ। ସେ ମଧ୍ୟ ଏହି ସିନେମାର ଗୀତ ଲୋକଙ୍କ ମନକୁ ଛୁଇଁ ସାରିଥିବାର କହିଛନ୍ତି। ତେବେ ସବୁଲୋକ ନିଜ ପରିବାର ସହ ଏହି ସିନେମା ଦେଖନ୍ତୁ ଓ କଳା ତଥା କଳାକାରଙ୍କୁ ଉତ୍ସାହିତ କରନ୍ତୁ ବୋଲି ଅନୁରୋଧ କରିଛନ୍ତି ।
ସିନେମା ନିର୍ଦ୍ଦେଶକ ସବ୍ୟସାଚୀଙ୍କ କୋଶଳୀ ସିନେମା ଭୂଖା ଓ ଆଦିମ ବିଚାର ଜାତୀୟ ଓ ଅନ୍ତର୍ଜାତୀୟ ସ୍ତରରେ ବେଶ ଆଦୃତ ହୋଇଥିଲା । ତେଣୁ ଏହି ସିନେମା ମଧ୍ୟ ସମାନ ଭାବରେ ସଫଳ ହେବ ବୋଲି ସମସ୍ତେ ଆଶାବାଦୀ ଅଛନ୍ତି। ତେବେ ଶୁକ୍ରବାର ଏହି ସିନେମାର ରିଲିଜକୁ ବଲାଙ୍ଗୀର ବିଧାୟକ ନରସିଂହ ମିଶ୍ର ଉଦଘାଟନ କରିବା ସହ ସିନେମାକୁ ଶେଷ ପର୍ଯ୍ୟନ୍ତ ଦେଖିଥିଲେ । ତେବେ ନିଜ ପ୍ରତିକ୍ରିୟାରେ ସେ ଏହି ସିନେମା ଗାନ୍ଧୀବାଦର ସୁନ୍ଦର ସନ୍ଦେଶ ଦେଉଥିବାର କହିଥିବାବେଳେ ଏହା ସବୁଠି ଲୋକପ୍ରିୟ ହେବ ବୋଲି କହିଛନ୍ତି । ସେହିପରି ଏହି ସିନେମା ସମାଜରେ ଭାଇଚାରା ବଜାୟ ରଖିବାରେ ମଧ୍ୟ ସହାୟକ ହେବ ବୋଲି ସେ ପ୍ରତିକ୍ରିୟା ଦେଇଛନ୍ତି।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
