ବଲାଙ୍ଗୀର: ପ୍ରସିଦ୍ଧ ରଥଯାତ୍ରା ପାଇଁ ବଲାଙ୍ଗୀରର ପ୍ରସ୍ତୁତି ଚୂଡ଼ାନ୍ତରେ ପହଞ୍ଚିଛି । 35 ବର୍ଷ ପରେ ନୂଆ ରଥରେ ରଥାରୂଢ ହେବେ ମହାପ୍ରଭୁ । ପୁରୀ ରଥ ଭଳି ନୂଆ ରଥର ନିର୍ମାଣ ହୋଇଛି । ବଲାଙ୍ଗୀରରେ ଜଗତର ନାଥ ମହାପ୍ରଭୁ ଜଗନ୍ନାଥଙ୍କ ରଥଯାତ୍ରା ପ୍ରସ୍ତୁତି ଚୂଡ଼ାନ୍ତରେ ପହଞ୍ଚିଛି ।
35 ବର୍ଷ ପରେ ନୂଆ ରଥରେ ରଥାରୂଢ ହେବେ ମହାପ୍ରଭୁ । ନୂଆ ରଥର ନିର୍ମାଣ କରିଛି ଦେବୋତ୍ତର ବିଭାଗ । ବଲାଂଗୀର ଉପଜିଲ୍ଲାପାଙ୍କ ପ୍ରତ୍ୟେକ୍ଷ ତତ୍ତ୍ବବଧାନରେ ଏହି ରଥର ନିର୍ମାଣ କରାଯାଇଛି । ଏଥିରେ 12 ବଢ଼େଇ ନିୟୋଜିତ ଥିବା ବେଳେ ପ୍ରଥମ କରି ପୁରୀ ରଥ ନିର୍ମାଣ ପ୍ରଣାଳୀରେ ଏଠିକାର ରଥ ନିର୍ମାଣ ହେଉଛି । ଏଥିରେ ନିୟୋଜିତ ଥିବା ବଢ଼େଇ ଉଦ୍ଧବ ସାହୁ କହିଛନ୍ତି ଯେ ଗତ ପାଞ୍ଚ ତାରିଖରୁ ଏମାନେ ରଥ ନିର୍ମାଣ କାମରେ ଲାଗିଛନ୍ତି । ପୁରୀ ରଥ ଭଳି ନୂଆ ରଥ ନିର୍ମାଣ ହେଉଛି ଏବଂ ଆଉ ଦିନ ଦୁଇ ଦିନରେ ରଥ ନିର୍ମାଣ କାମ ସରିବ । ସେହିପରି ଏଥର ରଥରେ ପାର୍ଶ୍ଵ ଦେବା ଦେବୀ ସ୍ଥାପିତ ହୋଇପାରି ନାହାନ୍ତି ଓ ଆସନ୍ତା ବର୍ଷ ତାହା ହେବ ବୋଲି ସେ କହିଛନ୍ତି । ଦେବୋତ୍ତର ବିଭାଗ ଅଧିକାରୀ ସୁଧୀର ଦାସ କହିଛନ୍ତି ଯେ, ''ରଥଯାତ୍ରା କମିଟି ନିଷ୍ପତ୍ତି ଅନୁସାରେ ଏଥର 35 ବର୍ଷ ପରେ ନୂଆ ରଥ ନିର୍ମାଣ ହେଉଛି । ଉପଜିଲ୍ଲାପାଙ୍କ ପ୍ରତ୍ୟକ୍ଷ ତତ୍ୱବାଧାନରେ ରଥ ନିର୍ମାଣ ଚାଲିଛି । ରଥଯାତ୍ରା ଯେପରି ଶାନ୍ତି ଶୃଙ୍ଖଳାରେ ହେବ ତା ପାଇଁ ସବୁ ପଦକ୍ଷେପ ନିଆଯିବ ।