ବଲାଙ୍ଗୀର: ପୁଣି ଜୋର ଧରିଛି ସ୍ଥାୟୀ ହାଇକୋର୍ଟ ବେଞ୍ଚ ଦାବି । କଟକ ଓକିଲ ସଂଘ ଏହାକୁ ବିରୋଧ କରିବା ପରେ ପୁଣି ଏକାଠି ହୋଇଛନ୍ତି ବଲାଙ୍ଗୀରବାସୀ । ଓକିଲ ସଂଘର ଆଭିମୁଖ୍ୟକୁ ତୀବ୍ର ବିରୋଧ କରିବା ସହ ଧାରଣା ଦେଇଛନ୍ତି ।
ବଲାଙ୍ଗୀରରେ ସ୍ଥାୟୀ ହାଇକୋର୍ଟ ବେଞ୍ଚ ସ୍ଥାପନ ଦାବି ନେଇ ପୁଣି ଜୋର ଧରିଛି ଦାବି । କଟକ ଓକିଲ ସଂଘର ବେଞ୍ଚ ବିରୋଧୀ ଆଭିମୁଖ୍ୟକୁ ନେଇ ଆଜି ଦଳ ମତ ନିର୍ବିଶେଷରେ ଜିଲ୍ଲାବାସୀ ଆନ୍ଦୋଳନକୁ ଓହ୍ଲାଇଛନ୍ତି । ଓକିଲ ସଂଘର ନିଷ୍ପତ୍ତିକୁ ଦୃଢ ନିନ୍ଦା କରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସମସ୍ତେ ଧାରଣା ଦେଇଥିଲେ। ସେହିପରି କଟକ ଓକିଲ ସଂଘର କୁଶ ପୁତ୍ତଳିକା ଦାହ କରିଛନ୍ତି। ବଲାଙ୍ଗୀର କ୍ରିୟାନୁଷ୍ଠାନ କମିଟିର ଅଧ୍ୟକ୍ଷତାରେ ଜିଲ୍ଲାର ବିଭିନ୍ନ ସଂଗଠନ, ବୁଦ୍ଧିଜୀବୀ ଓ ରାଜନୈତିକ ଦଳର ନେତା ଏଥିରେ ସାମିଲ ହୋଇଥିଲେ। ଜିଲ୍ଲାରେ ପୂର୍ବରୁ ହାଇକୋର୍ଟ ଥିଲା ଏବଂ ଯଶୱନ୍ତ ସିଂ କମିଶନ ରିପୋର୍ଟ ଅନୁସାରେ ବଲାଙ୍ଗୀରରେ ହାଇକୋର୍ଟ ବେଞ୍ଚ ସ୍ଥାପନ ପାଇଁ ସୁପାରିଶ ରହିଛି ।
ନିକଟରେ କେନ୍ଦ୍ର ଆଇନ ମନ୍ତ୍ରୀ ଏହା ପାଇଁ ନିଜର ବକ୍ତବ୍ୟ ଦେଇଥିଲେ । ଯାହାକୁ କଟକ ଓକିଲ ସଂଘ ବିରୋଧ କରିବା ସହ ବେଞ୍ଚ ସ୍ଥାପନକୁ ମଧ୍ୟ ବିରୋଧ କରିଛି । ଯାହାକୁ ନେଇ ସାରା ପଶ୍ଚିମ ଓଡ଼ିଶାରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
