ବଲାଙ୍ଗୀର: ବଲାଙ୍ଗୀରରେ ଧାନ କିଣାରେ ଅବ୍ୟବସ୍ଥା । ଖରିଫ ଋତୁ ଧାନ କିଣା ଆରମ୍ଭରୁ ଦେଖା ଦେଲାଣି କେଁ । ବଲାଙ୍ଗୀର ଜିଲ୍ଲା ତମାମ ଧାନ କିଣାରେ ଘୋର ଅବ୍ୟବସ୍ଥା ଓ କଟନି ଛଟନିକୁ ନେଇ ତାତିଲେ ଚାଷୀ । ଏହାକୁ ନେଇ ବିଭିନ୍ନ ସ୍ଥାନରେ ଚାଷୀ ଆନ୍ଦୋଳନ ଆରମ୍ଭ ହୋଇ ଯାଇଛି ।
ଜିଲ୍ଲାରେ ଚଳିତ ବର୍ଷ ନଭେମ୍ବର 25 ତାରିଖରୁ ଖରିଫ ଋତୁ ଧାନ କିଣା ଆରମ୍ଭ ହୋଇ ଯାଇଛି । ଏହାକୁ 10 ଦିନରୁ ଊର୍ଦ୍ଧ୍ବ ବିତି ଯାଇଥିବା ବେଳେ ଏଯାଏଁ ଅନେକ ସ୍ଥାନରେ ମଣ୍ଡି ଆରମ୍ଭ ହୋଇ ପାରି ନାହିଁ । ସେହିପରି ଯେଉଁଠି ଧାନ ମଣ୍ଡି ଆରମ୍ଭ ହୋଇଛି ସେଠି ଧାନ କ୍ବିଣ୍ଟାଲ ପିଛା 5 କିଲୋରୁ 7 କିଲୋ କଟନି ଛଟନି ହେଉଥିବା ଅଭିଯୋଗ ହୋଇଛି । ଯାହାଫଳରେ କଷ୍ଟ ଉପାର୍ଜିତ ଧାନକୁ ଚାଷୀ ବିକ୍ରି କରି ନ ପାରି ହଇରାଣ ହେଉଛନ୍ତି । ସେପଟେ ନିୟମ ଅନୁସାରେ ମଣ୍ଡିକୁ ମିଲର କେବଳ ଧାନ ଉଠାଇବା ପାଇଁ ଯିବାର ନିୟମ ଥିବାବେଳେ ଏଠି ସବୁ ମଣ୍ଡିରେ ମିଲରଙ୍କ ରାଜ ଓ ତାଙ୍କ ମାନମାନି ଚାଲିଥିବାର ଚାଷୀ ଅଭିଯୋଗ କରିଛନ୍ତି । ତେଣୁ ମିଲର ପେକ୍ସ ଓ ପ୍ରଶାସନର ମଧୁ ଚନ୍ଦ୍ରିକା ମଧ୍ୟରେ ଚାଷୀ ପେଷି ହେଉଥିବାର ସେମାନେ କହିଛନ୍ତି ।
ସେହିପରି ଜିଲ୍ଲାର ପ୍ରାୟ ସବୁ ମଣ୍ଡିରୁ ଏହି ଅଭିଯୋଗ ଆସୁଥିବା ବେଳେ ଚାଷୀ ଧାନ ବିକ୍ରି କରି ନ ପାରି ହଇରାଣ ହେଉଛନ୍ତି । ଏପରିକି ସେମାନେ ଧାନ ବିକ୍ରି କରିବା ପାଇଁ ପାଇଥିବା ଟୋକନର ସମୟ ସୀମା ମଧ୍ୟ ସାରିବାକୁ ବସିଛି । କିନ୍ତୁ ଏହି ଅବ୍ୟବସ୍ଥା ଯୋଗୁଁ ଧାନ ବିକ୍ରି କରି ପାରୁନାହାନ୍ତି । ଫଳରେ ଅନେକ ସ୍ଥାନରେ ଏବେ ଚାଷୀ ଆନ୍ଦୋଳନକୁ ଓହ୍ଲାଇଛନ୍ତି । ଯେଉଁଥିରେ ତୁରେକେଲା ଅଞ୍ଚଳରେ ଚାଷୀ ରାଜରାସ୍ତା ଅବରୋଧ କରି ଆନ୍ଦୋଳନ କରିଛନ୍ତି । ସମାନ ଭାବରେ ପୁଇଁତଲା ଅଞ୍ଚଳରେ ଜାମଗାଁ ଛତାପିପଳ ଇତ୍ୟାଦି ପେକ୍ସରେ ଚାଷୀ ତାଳିମାରି ଧାରଣା ଦେଇଛନ୍ତି ।
