ନୂଆଖାଇ ପାଳିଲେ ବଲାଙ୍ଗୀରବାସୀ, ଦେବାଳୟରେ ପ୍ରବଳ ଭିଡ଼

ଧାର୍ଯ୍ୟ ଲଗ୍ନ ଅନୁସାରେ ଇଷ୍ଟଦେବୀ ମା' ସମଲେଇ ଓ ମା’ ପାଟଣେଶ୍ୱରୀଙ୍କଠାରେ ଲାଗି ହୋଇଛି ନୂଆ ଅନ୍ନ ଭୋଗ ଚୁରା ଗୁଣ୍ଡା । ନୂଆ ଅନ୍ନ ଭୋଗ ଲାଗି କରିବା ପରେ ବଲାଙ୍ଗୀରବାସୀ ମିଳିମିଶି ନୂଆ ଖାଇଛନ୍ତି । ଅଧିକ ପଢନ୍ତୁ

ବଲାଙ୍ଗୀର: କୃଷି ଭିତ୍ତିକ ଗଣପର୍ବ ନୂଆଖାଇ ପାଇଁ ଉତ୍ସବ ମୁଖର ରହିଛି ବଲାଙ୍ଗୀର ଜିଲ୍ଲା । ଆଜି ଧାର୍ଯ୍ୟ ଲଗ୍ନ ଅନୁସାରେ ଇଷ୍ଟଦେବୀ ମା' ସମଲେଇ ଓ ମାଆ ପାଟଣେଶ୍ୱରୀଙ୍କଠାରେ ଲାଗି ହୋଇଛି ନୂଆ ଅନ୍ନ ଭୋଗ ଚୁରା ଗୁଣ୍ଡା । ମା'ଙ୍କ ଠାରେ ପ୍ରଥମ ଅନ୍ନର ଭୋଗ ଲାଗି ପରେ ସାରା ଜିଲ୍ଲାବାସୀ ନିଜ ଘରେ ମିଳିମିଶି ନୂଆ ଖାଇଛନ୍ତି । ଏହି ଅବସରରେ ସବୁ ଦେବାଳୟରେ ଭକ୍ତଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି ।


ସାରା ପଶ୍ଚିମ ଓଡ଼ିଶାରେ କୃଷି ଭିତ୍ତିକ ଗଣପର୍ବ ନୂଆଖାଇ ପାଳନ ହେଉଛି । ବଲାଙ୍ଗୀର ଜିଲ୍ଲାବାସୀ ଏହାକୁ ଅତି ଆନନ୍ଦ ଉଲ୍ଲାସରେ ପାଳନ କରିଛନ୍ତି । କମିଟି ଦ୍ୱାରା ସ୍ଥିର ହୋଇଥିବା ଲଗ୍ନ ସମୟ ମୁତାବକ ସବୁ ଇଷ୍ଟ ଦେବାଦେବୀଙ୍କୁ ନବାନ୍ନ ଲାଗି ହୋଇଛି । ତେବେ ବଲାଙ୍ଗୀର ଇଷ୍ଟଦେବୀ ମା ପାଟଣେଶ୍ୱରୀ ଓ ମା' ସମଳେଇଙ୍କ ପାଖରେ ମଧ୍ୟ ନୂଆ ଚୁରା ଗୁଣ୍ଡା ଲାଗି ହୋଇଛି । ଆଜିର ନୂଆଖାଇ ଦିନର ଅମୃତ ବେଳା ସକାଳ 10ଟା 28 ମିନିଟରୁ 10 ଟା 45 ମିନିଟ ମଧ୍ୟରେ ଏହି ଅନ୍ନ ଭୋଗ ଲାଗି ହୋଇଛି । ଯାହା ପରେ ସାରା ଜିଲ୍ଲାବାସୀ ମଧ୍ୟ ତାଙ୍କ ଘରେ ଇଷ୍ଟ ଦେବୀଙ୍କୁ ନୂଆ ଅନ୍ନ ଭୋଗ ଲାଗି କରିବା ପରେ ସମସ୍ତେ ମିଳିମିଶି ନୂଆ ଖାଇଛନ୍ତି ।

ସେପଟେ ବଲାଙ୍ଗୀରବାସୀ ବେଣୁ ଧର ପାଣ୍ଡେ କହିଛନ୍ତି,"ନୂଆଖାଇ ପର୍ବ ପଶ୍ଚିମ ଓଡ଼ିଶାର ବଡ ପର୍ବ ଅଟେ । ତେଣୁ ପ୍ରତିବର୍ଷ, ଏହାକୁ ସମସ୍ତେ ଅପେକ୍ଷା କରି ରହିଥାନ୍ତି । ଏହା ଏକ ଚାଷୀ ପର୍ବ ତଥା ଚାଷୀ ପାଇଁ ଏହାର ଯେତେ ମହତ୍ତ୍ବ ଅଛି ସେତିକି ମହତ୍ତ୍ବ ଚାକିରିଆ ଓ ଅନ୍ୟ ବର୍ଗର ଲୋକଙ୍କ ପାଇଁ ମଧ୍ୟ ରହିଥାଏ । ବାହାରେ ରହୁଥିବା ବନ୍ଧୁ ପରିଜନ ମଧ୍ୟ ଏହି ପର୍ବ ପାଳିବାକୁ ଘରକୁ ଆସିଥାନ୍ତି ।"

ତେବେ ନୂଆଖାଇରେ ଚାଷୀ ନିଜ କ୍ଷେତରେ ଅମଳ କରିଥିବା ଶସ୍ୟକୁ ଭକ୍ଷଣ କରିବା ପୂର୍ବରୁ ତାକୁ ଭଗବାନଙ୍କ ନିକଟରେ ଲାଗି କରିଥାଏ । ଏହିପରିଭାବେ ମା'ଙ୍କ ନିକଟରେ ବର୍ଷ ତମାମ ପାଇଁ ସୁଖ ସମୃଦ୍ଧି ଓ ଆଶୀର୍ବାଦ ଭିକ୍ଷା କରିଥାନ୍ତି ପଶ୍ଚିମ ଓଡ଼ିଶାବାସୀ । ତେବେ ଏହି ଆବହମାନ କାଳରୁ ନୂଆଖାଇ ପର୍ବକୁ ଚାଷୀ ସହିତ ସମସ୍ତେ ମିଳିମିଶି ପାଳନ କରିଥାନ୍ତି । ନିଜ ଇଷ୍ଟ ଦେବୀଙ୍କ ନିକଟରେ ନବାନ୍ନ ଲାଗି ପରେ ସମସ୍ତେ ମିଳିମିଶି ନୂଆ ଖାଇଥାନ୍ତି ।


ଇଟିଭି ଭାରତ, ବଲାଙ୍ଗୀର