ବଲାଙ୍ଗୀର: ଆଜିର ଆଧୁନିକ ଶିକ୍ଷିତ ସମାଜରେ ଜାତି ପ୍ରଥା ଏବେବି ଏକ ରୋଗ ଭଳି ଲୋକଙ୍କୁ ଗ୍ରାସ କରିଛି । ଏବଂ ଏହାର କୁପରିଣାମ ବିଭିନ୍ନ ସମୟରେ ସାମ୍ନାକୁ ଆସୁଛି । ତେବେ ଏଭଳି ଜଣେ ଅନ୍ୟ ଜାତିରେ ବିବାହ କରିଥିବାରୁ ମୃତ୍ୟୁ ବେଳେ ତାଙ୍କ ସମ୍ପର୍କୀୟ କିମ୍ବା ଗ୍ରାମବାସୀ, କେହି ପାଖ ମାଡ଼ି ନଥିଲେ । ଶେଷରେ ଅସହାୟ ଅବସ୍ଥାରେ ଥିବା ମୃତଦେହକୁ ସ୍ବେଚ୍ଛାସେବୀ ସତ୍କାର କରିଥିଲେ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବଲାଙ୍ଗୀର ଜିଲ୍ଲା ଟିକ୍ରାପଡ଼ା ଗ୍ରାମରେ ।
ସୂଚନା ମୁତାବକ, ସେହି ଗ୍ରାମର ବୁଲୁ ଧାରୁଆ ଅନ୍ୟ ଜାତିର ଜଣେ ଯୁବତୀ ଉତ୍ତରା ବତି କଲେତଙ୍କୁ ପ୍ରେମ ବିବାହ କରିଥିଲେ। ତେବେ ବିବାହ ପରେ ତାଙ୍କୁ ସମାଜରୁ ବାସନ୍ଦ କରାଯାଇଥିଲା । ଗତକାଲି(ଶନିବାର) ତାଙ୍କର ସ୍ତ୍ରୀ ଉତ୍ତରା ବତି କଲେତଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲରେ ଭର୍ତ୍ତି କରିଥିଲେ ସ୍ଵାମୀ । ଏବଂ ଚିକ୍ତିତ୍ସା ଦିନ ଅବସ୍ଥାରେ ତାଙ୍କ ସ୍ତ୍ରୀଙ୍କ ମୃତ୍ୟୁ ହୋଇଥିଲା। ସେପଟେ ଅନ୍ୟ ଜାତିରେ ବିବାହ କରିଥିବାରୁ ତାଙ୍କର କୌଣସି ସମ୍ପର୍କୀୟ କିମ୍ବା ଗ୍ରାମବାସୀ ପାଖ ମାଡ଼ି ନଥିଲେ।
ଶେଷରେ ଏହାର ଖବର ବଲାଙ୍ଗୀରର ବିଙ୍ଗ୍ ହ୍ୟୁମାନ ସଂଗଠନକୁ ଦିଆଯାଇଥିଲା । ଯାହା ପରେ ସଂଗଠନର କର୍ମକର୍ତ୍ତାମାନେ ଆସି ମୃତଦେହକୁ ନେଇ ସମ୍ମାନର ସହ ସତ୍କାର କରିଥିଲେ । ତେବେ ଆଜିର ଏହି ଶିକ୍ଷିତ ସମାଜର ଏହି ବ୍ୟବସ୍ଥା କେବେ ବଦଳିବ ତାକୁ ନେଇ ପୁଣି ଏକ ପ୍ରଶ୍ନ ଛିଡ଼ା ହୋଇଛି।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
