ବଲାଙ୍ଗୀର: ଜିଲ୍ଲାରେ ଜାଲ୍ ପ୍ରମାଣପତ୍ର ଦେଇ ଅଯୋଗ୍ୟ ଚାକିରି ହାତେଇଥିବା ବେଳେ ଯୋଗ୍ୟ ପ୍ରାର୍ଥୀ ଏଥିରେ ବାଦ୍ ପଡିଥିବାର ଅଭିଯୋଗ ହୋଇଛି । ବଲାଙ୍ଗୀର ଜିଲ୍ଲା ସଇଁତଳା ବ୍ଲକ ଅନ୍ତର୍ଗତ କରମତୁଲା ଗ୍ରାମରେ ଜୁଲାଇ 2021ରେ 33/11 କେଭିର ଏକ ବିଦ୍ୟୁତ୍ ଗ୍ରୀଡ ସ୍ଥାପିତ ହୋଇଥିଲା । ଓଡ଼ିଶା ଶକ୍ତି ବିଭାଗ ଦ୍ଵାରା ଏହାର ସ୍ଥାପନ ହୋଇଥିବା ବେଳେ ଏଥିରେ ସାତ ଜଣ କର୍ମଚାରୀଙ୍କୁ ନିଯୁକ୍ତି ମିଳିଥିଲା । ତେବେ ଟାଟା ପାୱାର ଅଧୀନରେ ଏହା ଥିବା ବେଳେ ସୂର୍ୟା ଇଲେକ୍ଟ୍ରିାଲ କମ୍ପାନୀ ଜରିଆରେ ଏହି ସାତ ଜଣଙ୍କ ନିଯୁକ୍ତି ହୋଇଥିଲା । ତେବେ ଏଥିରେ ଜାଲ ପ୍ରମାଣପତ୍ର ଦେଇ ଜଣେ ଅଯୋଗ୍ୟ ପ୍ରାର୍ଥୀ ଚାକିରି ହାତେଇଥିବାର ଅଭିଯୋଗ ହୋଇଛି।
ଏଠାରେ ଦୁଷ୍ମନ୍ତ ସାହୁ ଲାଇନ୍ ମେନ୍ ଭାବରେ କାମ କରୁଥିବା ବେଳେ ସେ ଅନ୍ୟ ଜଣକର ଆଇଟିଆଇ ପ୍ରମାଣପତ୍ର ଦେଇ ଚାକିରି କରୁଥିବାର ଜଣାପଡ଼ିଛି । ତେବେ ସେ ଦେଇଥିବା ପ୍ରମାଣପତ୍ରଟି ମୋହନ ଗିରି ନାମରେ ଥିବାବେଳେ ତାଙ୍କ ବଦଳରେ ସେ କେମିତି ଏହି ଚାକିରି ପାଇଲେ ତାହା ଅନେକରେ ପ୍ରଶ୍ନ ସୃଷ୍ଟି କରିଛି । ସେପଟେ ଏହାକୁ ନେଇ ଗ୍ରାମବାସୀ ଓ ଆଦିବାସୀ ସଂଘ ଆନ୍ଦୋଳନ କରିବା ଶହ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଅନ୍ୟପଟେ ସମ୍ପୃକ୍ତ କର୍ମଚାରୀ ଜଣକ ଏହା ସ୍ବୀକାର କରିଥିବା ବେଳେ ଭୁବନେଶ୍ୱରର ଏକ ସଂସ୍ଥା ତାଙ୍କୁ ଏହି ପ୍ରମାଣପତ୍ର ଦେଇଥିବାର ସେ କହିଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହିଦ, ଇଟିଭି ଭାରତ
