ବଲାଙ୍ଗୀର: ବଲାଙ୍ଗୀର ସହରର ଏକ ମୋବାଇଲ ଦୋକାନରୁ ପ୍ରାୟ 50 ଲକ୍ଷ ଟଙ୍କାର ମୋବାଇଲ ଚୋରି ଅଭିଯୋଗ । ଦୋକାନ ତାଲା ଭାଙ୍ଗି ମୋବାଇଲ ସହ ଅନ୍ୟ ଉପକରଣ ଚୋରି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସହରରେ ଦିନକୁ ଦିନ ଚୋରି ଓ ଡ଼କାୟତି ବଢ଼ି ଚାଲିଛି। ତେବେ ସହର ମଧ୍ୟରେ ଥିବା ଏକ ହୋଲସେଲ ମୋବାଇଲ ଦୋକାନ ପ୍ରାୟ 5୦ ଲକ୍ଷ ଟଙ୍କାର ମୋବାଇଲ ଚୋରି ହୋଇଥିବାର ଅଭିଯୋଗ ହୋଇଛି । ଟାଉନ ଥାନା ପୋଲିସ ସାଇଣ୍ଟିଫିକ୍ ଟିମ୍ ଓ ସନ୍ଧାନି କୁକୁର ସହାୟତାରେ ତଦନ୍ତ ଚଳାଇଛି ।
ଆଜି ସକାଳୁ ଦୋକାନର ତାଲା ଭଙ୍ଗା ଯାଇଥିବାର ଦୋକାନ ମାଲିକ ଦେଖିଥିଲେ। ଏହାପରେ ସେ ଟାଉନ ଥାନା ପୋଲିସକୁ ଚୋରି ହୋଇଥିବା ବିଷୟରେ ଜଣାଇବା ସହ ଲିଖିତ ଅଭିଯୋଗ କରିଛନ୍ତି । ଦୋକାନରୁ ନାମୀ ଦାମୀ କମ୍ପାନୀର ମୋବାଇଲ ଓ ସାମଗ୍ରୀ ଚୋରି ହୋଇଥିବାର ଦୋକାନୀ ଅଭିଯୋଗ କରିଛନ୍ତି।
ଅନ୍ୟପଟେ ସହର ମଧ୍ୟରୁ ଏତେ ବଡ ଧରଣର ଚୋରି ପ୍ରଥମ ଘଟଣା ହୋଇଥିବା ବେଳେ ଟାଉନ ପୋଲିସ ସନ୍ଧାନି କୁକୁର ଓ ସାଇଣ୍ଟିଫିକ୍ ଟିମ୍ ସହ ତଦନ୍ତ ଚଳାଇଛି । ସେହିପରି ପାଖ ଦୋକାନର ସିସିଟିଭି ଫୁଟେଜକୁ ଆଧାର କରି ପୋଲିସ୍ ତଦନ୍ତ ଜାରି ରଖିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
