ବଲାଙ୍ଗୀର: ଜଙ୍ଗଲରେ ଅବାଧ ବନ୍ୟଜନ୍ତୁ ଶିକାର କରିବା ଘଟଣାରେ ଚାରି ଜଣଙ୍କୁ ବାନ୍ଧିଛି ପୋଲିସ । ଏହି ଶିକାରୀଙ୍କ ଠାରୁ ପୋଲିସ ଆଠଟି ବନ୍ଧୁକ ସହ ବିପୁଳ ଗୁଳି ଗୋଲା ମଧ୍ୟ ଜବତ କରିଛି । ଏଭଳି ଦୃଶ୍ୟ ଦେଖିବାକୁ ମିଳିଛି ବଲାଙ୍ଗୀର ଜିଲ୍ଲା ମୁରିବାହାଲ ଥାନା ହଳଦୀ ପଞ୍ଚାୟତ କର୍ଲାପିଟା ଗ୍ରାମ ଜଙ୍ଗଲରେ । ଦୀର୍ଘ ଦିନ ହେଲା ଏହି ଜଙ୍ଗଲରୁ ଜଙ୍ଗଲୀ ଜୀବଜନ୍ତୁର ଶିକାର ହେଉଥିଲା । ଆଜି ବିଶେଷ ସୁତ୍ରରୁ ଖବରପାଇ ଗାଁର ଜଙ୍ଗଲରେ ଚଢ଼ାଉ କରିଥିଲା ମୁରିବାହାଲ ପୁଲିସ ।
ଚଢ଼ାଉ ସମୟରେ ଶିକାରୀଙ୍କ ପାଖରୁ ୮ଟି ବନ୍ଧୁକ, ଗୁଳିଗୋଳା ଓ ବହୁ ବିସ୍ଫୋରକ ସାମଗ୍ରୀ ଜବତ କରିଥିଲା । ଉକ୍ତ ଘଟଣାରେ କର୍ଲ୍ଲାପିଟା ଗାଁର ଧରଣୀ ଚନ୍ଦନ, ପୁରନ୍ଦର ଧରୁଆ, ଦେବାରଚନ ଧରୁଆ, ସାଧୁ ଧରୁଆ ଥିଲେ । ମୋଟ ସାମିଲ ଥିବା ୪ ଜଣଙ୍କୁ ମୁରିବାହାଲ ପୋଲିସ ଗିରଫ କରି ତଦନ୍ତ ପରେ କୋର୍ଟ ଚାଲାଣ କରିଛି । ଅଭିଯୁକ୍ତମାନେ ଜଙ୍ଗଲି ଜୀବଜନ୍ତୁ ଶିକାର ଉଦ୍ଦେଶ୍ୟରେ ବ୍ୟବହୃତ କରୁଥିବା ଆଠ ଦେଶୀ ବନ୍ଧୁକ, ଲିଡ୍ ଅମୟୁନେସନ ୪୫, ଷ୍ଟିଲ ବଲ ଅମୟୁନେସନ, ଜୀବନ୍ତ ଗୁଳି, ଖୋଖା, ଗନ ପାଉଡର, ଗନ କଟନ, ନଡ଼ିଆ କତାକୁ ଜବତ କରିଛି । ଏନେଇ ମୁରିବାହାଲ ଥାନା ପରିସରରେ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି କଣ୍ଟାବାଞ୍ଝି ଏସଡିପିଓ ହୃଷିକେଶ ମେହେର ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହିଦ, ଇଟିଭି ଭାରତ
