ବଲାଙ୍ଗୀର: ଆସନ୍ତା ପାଞ୍ଚ ତାରିଖରୁ ରାଜ୍ୟ ସରକାର ଲକଡାଉନ ଘୋଷଣା କରିଛନ୍ତି । ତେବେ ଏହାକୁ ନେଇ ବଲାଙ୍ଗୀରରେ ଲୋକଙ୍କ ମଧ୍ୟରେ କୋକୁଆ ଭୟ ଦେଖିବାକୁ ମିଳିଛି । ଏବଂ ଲୋକେ ଜରୁରୀ ସାମଗ୍ରୀ କିଣିବା ପାଇଁ ସବୁଠି ପ୍ରବଳ ଭିଡ ଜମାଉଛନ୍ତି ଜନତା । ଯାହା ଫଳରେ ସହରର ସବୁ ମୁଖ୍ୟ ରାସ୍ତା ଛକ ଓ ଗଳିରେ ଲୋକଙ୍କ ପ୍ରବଳ ଭିଡ ଜମିଥିବାବେଳେ କୋରୋନା ନିୟମର ସମ୍ପୂର୍ଣ୍ଣ ଭାବରେ ଉଲଂଘନ କରାଯାଇଥିଲା ।
ତେବେ ଲକ ଡାଉନର ଭୟ କୋରୋନା ଠାରୁ ମଧ୍ୟ ଜିତି ଯାଇଥିଲା । ଏଥିରେ ବଲାଙ୍ଗୀରର ସହର ଛଡା ପାଟଣାଗଡ଼, ଟିଟିଲାଗଡ଼ ଓ କଣ୍ଟାବାଞ୍ଜି ସବୁଠି ସୋମବାର ଏହିଭଳି ସମାନ ଚିତ୍ର ଦେଖିବାକୁ ମିଳିଥିଲା । ତେବେ ପୋଲିସ ଓ ପ୍ରଶାସନ ଏହାକୁ ନିୟନ୍ତ୍ରଣ କରିବାରେ ବିଫଳ ହୋଇଥିଲେ ।
ପରିସ୍ଥିତି ଏଭଳି ହୋଇଥିଲା ଯେ ବଲାଙ୍ଗୀର ଏସପି ଓ ତହସିଲଦାର ନିଜେ ଭିଡକୁ ନିୟନ୍ତ୍ରଣ କରିବାରେ ଲାଗି ପଡ଼ିଥିଲେ । ତେବେ ଲକଡାଉନକୁ ନେଇ ଲୋକେ ଭୟଭୀତ ଥିବା ବେଳେ ପ୍ରଶାସନ ଏହାକୁ ନେଇ ଚିନ୍ତାରେ ପଡ଼ି ଯାଇଥିଲା । ଲକଡାଉନରେ ମଧ୍ୟ ଲୋକେ ସବୁ ଜରୁରୀ ସାମଗ୍ରୀ କିଣିବାର ସୁବିଧା ପାଇବେ ତେଣୁ ଲୋକ ଭୟଭୀତ ନହୋଇ ଅଯଥାରେ ଭିଡ ନକରିବାକୁ ପ୍ରଶାସନ ନିବେଦନ କରିଥିଲା।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
