ବଲାଙ୍ଗୀର: ସହରର ତୁଷୁରା ନିକଟରେ ଶୁକ୍ରବାର ଏକ ବୋଲେରୋ ବାଇକ୍କୁ ଧକ୍କା ଦେବା ଫଳରେ ବାଇକ୍ରେ ଥିବା ଛୋଟ ଶିଶୁ ସହ ବାପାର ଘଟଣା ସ୍ଥଳରେ ମୃତ୍ୟୁ ହୋଇଛି । ସେପଟେ ମା' ଓ ଆଉ ଜଣେ ଶିଶୁ ଗୁରୁତର ଆହତ ହୋଇଥିବା ବେଳେ ସେମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ମାଆର ମଧ୍ୟ ମୃତ୍ୟୁ ଘଟିଛି । ମୃତକମାନେ ହେଲେ ମାଖାନୁ ବିଶି, ତାଙ୍କ ସ୍ତ୍ରୀ ମୁକ୍ତ ବିଶି ଓ ପୁଅ ଶମ୍ଭୁ ବିଶି ।
କଳାହାଣ୍ଡି ଜିଲ୍ଲା କରଳାମୁଣ୍ଡା ବ୍ଲକ ରିଷିଡା ଗାଁ ର ମାନକୁନୁ ରଣା ନିଜ ଦୁଇ ପୁଅ ଓ ସ୍ତ୍ରୀ ସହ ବାଇକ ଯୋଗେ ଘରକୁ ଫେରୁଥିଲେ । ଜମ୍ଭେଲ ଛକର ମିଶ୍ର ଢ଼ାବା ପାଖରେ ଏକ ବୋଲେରୋ ସେମାନଙ୍କୁ ଧକ୍କା ଦେଇଥିଲା । ତେବେ ଧକ୍କା ଦେବା ମାତ୍ରେ ବାଇକ୍ରେ ନିଆଁ ଲାଗିଯାଇଥିଲା ।
ତେବେ ଘଟଣାସ୍ଥଳରେ ବାପା ଓ ତିନି ବର୍ଷର ଶିଶୁପୁତ୍ରଙ୍କର ମୃତ୍ୟୁ ହୋଇଥିବାବେଳେ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମାଆ ମଧ୍ୟ ଆଖି ବୁଜିଛନ୍ତି । ଅନ୍ୟପଟେ 1 ବର୍ଷର ପୁତ୍ର ଗୁରୁତର ଆହତ ହୋଇ ଜୀବନ-ମୃତ୍ୟୁ ସହ ସଂଘର୍ଷ କରୁଥିବା ସୂଚନା ମିଳିଛି । ତୁଷୁରା ପୋଲିସ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
