ବଲାଙ୍ଗୀର: ଡାକ୍ତରୀ ଛାତ୍ରୀଙ୍କ ମୃତ୍ୟୁକୁ ନେଇ ରାଜରାସ୍ତାକୁ ଓହ୍ଲାଇଛି ବହୁଜନ ସମାଜ ପାର୍ଟି । ସୂଚନାନୁସାରେ ବଲାଙ୍ଗୀର ଜିଲ୍ଲା ଭୀମ ଭୋଇ ମେଡିକାଲ୍ କଲେଜ ଛାତ୍ରୀଙ୍କ ମୃତ୍ୟୁ ଘଟଣାରେ ଆଜି (ସୋମବାର) ମୃତ ଛାତ୍ରୀଙ୍କ ପରିବାରବର୍ଗ ଓ ବହୁଜନ ସମାଜ ପାର୍ଟି ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି ।
ତେବେ ଏହି ଘଟଣାକୁ 10 ଦିନରୁ ଊର୍ଦ୍ଧ୍ବ ବିତି ଥିଲେ ସୁଦ୍ଧା ପୋଲିସ୍ ଏହାକୁ ଆତ୍ମହତ୍ୟା ରୂପ ଦେଇ ଚୁପ ବସିଥିବା ନେଇ ଅଭିଯୋଗ ଆଣିଛନ୍ତି ପରିବାର ଲୋକେ । ସେପଟେ ଏହି ଘଟଣାରେ ପରିବାର ଲୋକେ ସିଧାସଳଖ ଛାତ୍ରୀ ଜଣକ ରହୁଥିବା ହଷ୍ଟେଲ ୱାର୍ଡେନ, ସହପାଠୀ ଓ ତାଙ୍କ ପୁରୁଷ ବନ୍ଧୁଙ୍କ ନାଁରେ ଅଭିଯୋଗ କରିଛନ୍ତି ।
ତେବେ ଏହି ଘଟଣାରେ ବଲାଙ୍ଗୀର ଥାନାରେ ଅଭିଯୋଗ କରିଥିବା ସତ୍ତ୍ବେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଅଭିଯୋଗରେ ଧାରଣାରେ ବସିଥିବା ନେଇ ସୂଚନା ମିଳିଛି । ସେପଟେ ଗତ ସାତ ତାରିଖରେ ବଲାଙ୍ଗୀର ଭୀମ ଭୋଇ ମେଡିକାଲ୍ କଲେଜରେ ତୃତୀୟ ବର୍ଷରେ ଅଧ୍ୟୟନ ରତ ଡାକ୍ତରୀ ଛାତ୍ରୀ ନିରୁପମା ନନ୍ଦଙ୍କ ମୃତଦେହ ସନ୍ଦେହଜନକ ଅବସ୍ଥାରେ ହଷ୍ଟେଲ କୋଠରୀରୁ ଉଦ୍ଧାର ହୋଇଥିବା ଜଣାପଡିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ୍, ଇଟିଭି ଭାରତ
