ବଲାଙ୍ଗୀର: ଲାଞ୍ଚ ନେବା ଅଭିଯୋଗରେ ବନ୍ଧାହେଲେ ଜିଲ୍ଲା କୃଷି ଅଧିକାରୀ । ଏନେଇ ଆଜି (ମଙ୍ଗଳବାର) ଜିଲ୍ଲା କୃଷି କାର୍ଯ୍ୟାଳୟରେ ପିଓଏସ ମେସିନ ପାଇଁ ୭ ହଜାର ଟଙ୍କା ଲାଞ୍ଚ ନେଉଥିବାବେଳେ ଗିରଫ କରିଛି ଭିଜିଲାନ୍ସ ଟିମ୍ । ତେବେ ଗିରଫ ହୋଇଥିବା ଅଧିକାରୀ ଜଣକ ହେଉଛନ୍ତି ହିମାଂଶୁ ଶେଖର ପାଢ଼ୀ ।
ସୂଚନାନୁସାରେ ଲୋଇସିଂହା ବ୍ଲକ୍ ପଣ୍ଡକିଟାଲ ଗାଁର ଦୁର୍ଯ୍ୟୋଧନ ବାରିକ ୨୦୧୯ ମସିହାରୁ ସାର ବିକ୍ରି ପାଇଁ ଅନୁମତି ପାଇଥିବାବେଳେ ତାଙ୍କୁ ପିଓଏସ ମେସିନ ପ୍ରଦାନ ପାଇଁ କୃଷି ଅଧିକାରୀ ଜଣକ ୧୦ ହଜାର ଟଙ୍କା ଦାବି କରିଥିଲେ । ତେବେ ମଙ୍ଗଳବାର ଦୁର୍ଯ୍ଯୋଧନ ବାରିକଙ୍କ ଠାରୁ ୭ ହଜାର ଟଙ୍କା ନେବା ବେଳେ କୃଷି ଅଧିକାରୀ ହିମାଂଶୁ ପାଢ଼ୀଙ୍କୁ ଗିରଫ କରିଛି ଭିଜିଲାନ୍ସ ଟିମ୍ ।
ସେପଟେ ଏହି ଲାଞ୍ଚ ନେବା ଘଟଣାରେ ଜବତ ହୋଇଥିବା ୭ ହଜାର ଟଙ୍କା କେମିକାଲ ଟେଷ୍ଟରେ ପଜିଟିଭ ଥିବା ଭିଜିଲାନ୍ସ ଡିଏସପି ସୂଚନା ଦେଇଛନ୍ତି । ଏଥିସହ ତାଙ୍କ ହାତୀଶାଳପଡାସ୍ଥିତ ଷ୍ଟାଫ କ୍ବାର୍ଟରରେ ଚଢ଼ାଉ କରିବା ସହ ତାଙ୍କ ଘରୁ ଚଢାଉ ସମୟରେ ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ଜବତ କରାଯିବା ସହ ନଗଦ ୨୮ ହଜାର ୨ ଶହ ଟଙ୍କା ଜବତ କରାଯାଇଛି । ଆଉ ଏହି ଲାଞ୍ଚ ନେବା ଘଟଣାରେ ଲାଞ୍ଚୁଆ କୃଷି ଅଧିକାରୀଙ୍କୁ କୋର୍ଟ ଚାଲାଣ କରାଯିବ ବୋଲି ଭିଜିଲାନ୍ସ ପକ୍ଷରୁ ସୂଚନା ମିଳିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
