ବଲାଙ୍ଗୀର: ଜିଲ୍ଲାରେ ସ୍କୁଲ ଛାତ୍ରଛାତ୍ରୀଙ୍କୁ ଶିକ୍ଷୟତ୍ରୀ ସ୍ବାମୀଙ୍କ ମାଡ଼ ଘଟଣା ବେଶ୍ ଚର୍ଚ୍ଚା ହେଉଥିଲା। ଯାହାକୁ ନେଇ ମଙ୍ଗଳବାର ବଲାଙ୍ଗୀର ଶିଶୁ ସୁରକ୍ଷା କମିଟି ଓ ଶିଶୁ ମଙ୍ଗଳ କମିଟିର ସଦସ୍ୟ ସମ୍ପୃକ୍ତ ସ୍କୁଲକୁ ଯାଇ ତଦନ୍ତ ଆରମ୍ଭ କରିଛନ୍ତି। ତଦନ୍ତ ସରିବା ପରେ ରିପୋର୍ଟ ସିଡବ୍ଲ୍ୟୁସିକୁ ଦିଆଯିବା ସହ ରିପୋର୍ଟ ଅନୁସାରେ ପଦକ୍ଷେପ ନିଆଯିବ।
ଦୁଇ ଦିନ ତଳେ ବଲାଙ୍ଗୀର ଜାଲପାଲି ଗ୍ରାମର ପ୍ରାଥମିକ ସ୍କୁଲରେ ଏପରି ଘଟଣା ଘଟିଥିଲା। ଯେଉଁଥିରେ ଛତାର ଚିତ୍ର ଆଙ୍କି ନପାରିବାରୁ ସେଠି ଉପସ୍ଥିତ ଥିବା ଶିକ୍ଷୟତ୍ରୀଙ୍କ ସ୍ବାମୀ ସୈଦାଗର ମେହେର ସବୁ ଛାତ୍ରଛାତ୍ରୀଙ୍କୁ ନିସ୍ତୁକ ମାଡ଼ ମାରିଥିଲେ। ଏଥିରେ ଦଶ ଜଣ ଶିଶୁ ଆହତ ହୋଇଥିବା ବେଳେ ମାମଲା ଥାନାରେ ପହଞ୍ଚିଥିଲା।
ଘଟଣାରେ ସମ୍ପୃକ୍ତ ବ୍ୟକ୍ତିବିଶେଷ ଏବେ ଫେରାର ଥିବାବେଳେ, ତାଙ୍କ ସ୍ତ୍ରୀ ଶିକ୍ଷୟତ୍ରୀ ଲକ୍ଷ୍ମୀ ମେହେରଙ୍କୁ ଜିଲ୍ଲାପାଳ ଚାକିରୀରୁ ନିଲମ୍ବିତ କରିଥିଲେ। ଏନେଇ ମଙ୍ଗଳବାର ସିଡବ୍ଲ୍ୟୁସି ଓ ଶିଶୁ ସୁରକ୍ଷା କମିଟିର ପାଞ୍ଚ ଜଣିଆ ଦଳ ସ୍କୁଲକୁ ଯାଇ ତଦନ୍ତ ଆରମ୍ଭ କରିଛନ୍ତି । ସେଠାରେ ଛାତ୍ରଛାତ୍ରୀଙ୍କୁ ବୟାନ ରେକର୍ଡ କରାଯାଇଛି।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
