ବଲାଙ୍ଗୀର: ଜିଲ୍ଲାରେ କଂଗ୍ରେସ ପକ୍ଷରୁ ରଣ ହୁଙ୍କାର ଦିଆଯାଇଛି । ବଲାଙ୍ଗୀରକୁ ବନ୍ୟା କ୍ଷତିପୂରଣ ଦାବିରେ ଆଜି କଂଗ୍ରେସ ପକ୍ଷରୁ ବିଶାଳ ସମାବେଶ କରାଯାଇଥିଲା। ଏହି ସମାବେଶର କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା ଓ ନରସିଂହ ମିଶ୍ର ନେତୃତ୍ବ ନେଇଥିଲେ । ଦାବି ଶୀଘ୍ର ପୂରଣ ନହେଲେ ଆଗାମୀ ଦିନରେ ତୀବ୍ର ଆନ୍ଦୋଳନ ସହ ବିଧାନସଭାକୁ ମଧ୍ୟ ଅଚଳ କରିବାର ଧମକ ଦେଇଛି କଂଗ୍ରେସ ।
ହଜାର ହଜାର କଂଗ୍ରେସ କର୍ମୀ ଓ ସାଧରାଣ ଜନତା ଏହି ସମାବେଶରେ ସାମିଲ ହୋଇଥିଲେ । ସଭିଏଁ ସହରରେ ଶୋଭାଯାତ୍ରା କରିବା ସହ ଜିଲ୍ଲାପାଳଙ୍କ କାର୍ଯ୍ୟଳୟକୁ ଦୀର୍ଘ ସମୟ ଧରି ଘେରାଉ କରିଥିଲେ। ଏହି ବିରାଟ ସମାବେଶ ତଥା ଆନ୍ଦୋଳନର କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା ଓ ବଲାଙ୍ଗୀର ବିଧାୟକ ନରସିଂହ ମିଶ୍ର ନେତୃତ୍ବ ନେଇ ରାଜ୍ୟ ସରକାରଙ୍କ ପାଖରେ 21 ଦଫା ଦାବି ପତ୍ର ପ୍ରଦାନ କରିଥିଲେ।
ଯେଉଁଥିରେ ବନ୍ୟା କ୍ଷୟକ୍ଷତି ପାଇଁ ବଲାଙ୍ଗୀର ଜିଲ୍ଲାକୁ ଏକ ହଜାର କୋଟି ଶୀଘ୍ର ପ୍ରଦାନ କରିବାକୁ ଏମାନେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପାଖରେ ଦାବି ଉପସ୍ଥାପନ କରିଥିଲେ। ସେହିପରି ଜିଲ୍ଲାପାଳଙ୍କ ସହ କଂଗ୍ରେସ ଆଲୋଚନା କରି ସ୍ଥାନୀୟ ବିଭିନ୍ନ ସମସ୍ୟା ଉପରେ ପଦକ୍ଷେପ ନେବାକୁ ଦାବି କରିଥିଲେ । ଏହି ସମସ୍ୟା ମଧ୍ୟରେ ଜିଲ୍ଲାରେ ବଢି ଚାଲିଥିବା ଅପରାଧକୁ ନିୟନ୍ତ୍ରଣ, ରାଜେନ୍ଦ୍ର କଲେଜରେ ଖାଲି ପଡିଥିବା ଅଧ୍ୟାପକ ପଦବୀ ପୂରଣ, ବଲାଙ୍ଗୀରର ଲୋୟର ସୁକ୍ତେଲ ପ୍ରକଳ୍ପ କାମ ଶୀଘ୍ର ସରିବା, ବଲାଙ୍ଗୀରରେ ବାଇପାସ ନିର୍ମାଣ ଭଳି ଅନେକ ସମସ୍ୟା ସମ୍ପର୍କରେ ଜଣାଇଥିଲେ ।
ଏସବୁ ଦାବି ଶୀଘ୍ର ପୂରଣ ନହେଲେ ଆଗାମୀ ଦିନରେ ତୀବ୍ର ଆନ୍ଦୋଳନ ସହ ବିଧାନସଭାକୁ ମଧ୍ୟ ଅଚଳ କରିବାର ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହିଦ, ଇଟିଭି ଭାରତ
