ବଲାଙ୍ଗୀର: କୋଡିଏ ଛାତ୍ରଛାତ୍ରୀରୁ କମ ଥିବା ସ୍କୁଲ ବନ୍ଦ କରିବା ନିଷ୍ପତ୍ତିରେ ରାଜ୍ୟର ହଜାର ହଜାର ସ୍କୁଲ ବନ୍ଦ ହୋଇଯାଇଛି । ତେବେ ଏହାକୁ ତୀବ୍ର ବିରୋଧ କରିଛି ଆମ ଆଦମୀ ଦଳ । ଆସନ୍ତା ଦିନରେ ଏମାନେ ଉତ୍ତରାଞ୍ଚଳ ଆରଡିସିଙ୍କ କାର୍ଯ୍ୟାଳୟ ଘେରିବେ ବୋଲି ନିଷ୍ପତ୍ତି ନେଇଛନ୍ତି ।
କେନ୍ଦ୍ର ସରକାରଙ୍କ ନୀତି ଆୟୋଗର ନିଷ୍ପତ୍ତି କ୍ରମେ ରାଜ୍ୟ ସରକାର ରାଜ୍ୟର 20 ଛାତ୍ରଛାତ୍ରୀରୁ କମ ଥିବା ସ୍କୁଲ ଗୁଡିକୁ ବନ୍ଦ କରି ଦେଇଛନ୍ତି । ଏହାକୁ ତୀବ୍ର ବିରୋଧ କରିଛି ଆମ ଆଦମୀ ଦଳ । ରାଜ୍ୟରେ ଏଠି ହଜାର ହଜାର ସ୍କୁଲ ବନ୍ଦ ହୋଇ ଯାଇଥିବାବେଳେ ଛାତ୍ରଛାତ୍ରୀ ଶିକ୍ଷା ଭଳି ମୌଳିକ ସୁବିଧାରୁ ବଞ୍ଚିତ ହେବେ ବୋଲି ଏମାନେ କହିଛନ୍ତି ।
ଏଥିରେ ବଲାଙ୍ଗୀର ଜିଲ୍ଲାର 296ଟି ସ୍କୁଲ ବନ୍ଦ ହୋଇଥିବାବେଳେ ପଶ୍ଚିମ ଓଡିଶାରେ ମଧ୍ୟ ହଜାର ହଜାର ସ୍କୁଲ ବନ୍ଦ ହୋଇଯାଇଛି । ଏହା ବିରୋଧରେ ଆସନ୍ତା ଦିନରେ ଆମ ଆଦମୀ ପାର୍ଟିର 10ଟି ଜିଲ୍ଲାର ପ୍ରତିନିଧିମାନେ ସମ୍ବଲପୁର ଉତ୍ତରାଞ୍ଚଳ ଆରଡିସିଙ୍କ କାର୍ଯ୍ୟାଳୟ ଘେରିବେ ବୋଲି ନିଷ୍ପତ୍ତି ନେଇଛନ୍ତି । ସେହିପରି ଏହି ନିଷ୍ପତ୍ତି ଫେରାଇ ନନେଲେ ଏମାନେ ତୀବ୍ର ଆନ୍ଦୋଳନ କରିବେ ବୋଲି କହିଛନ୍ତି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ୍, ଇଟିଭି ଭାରତ
