ବଲାଙ୍ଗୀର: 20ତମ ବଲାଙ୍ଗୀର ଲୋକ ଉତ୍ସବ ଉଦଘାଟିତ ହୋଇଯାଇଛି । ରାଜ୍ୟ ତଥା ରାଜ୍ୟ ବାହାର ଲୋକକଳା, ନୃତ୍ୟ ଓ ଗୀତରେ ଝୁମୁଛି ବଲାଙ୍ଗୀର । ସ୍ଥାନୀୟ କୋଶଳ କଳାମଣ୍ଡପରେ ଉଦଘାଟନ ସମାରୋହ ଅନୁଷ୍ଠିତ ହୋଇଯାଇଛି । ଏହି ସମାରୋହରେ ମୁଖ୍ୟ ଅତିଥି ଭାବରେ ବଲାଙ୍ଗୀର ସାଂସଦ ସଂଗୀତା ସିଂଦେଓ ଯୋଗ ଦେଇଥିବାବେଳେ ତାଙ୍କ ସହ ଲୋଇସିଂହା ବିଧାୟକ ମୁକେଶ ମହାଳିଙ୍ଗ, ଜିଲ୍ଲା ପରିଷଦ ଅଧ୍ୟକ୍ଷ୍ୟା, ଜିଲ୍ଲାପାଳ ଓ ଏସପି ପ୍ରମୁଖ ଉପସ୍ଥିତ ଥିଲେ ।
ଏହି ଲୋକ ଉତ୍ସବର ଉଦଘାଟନ କରିବା ସହ ଲୋକ ଉତ୍ସବ ସ୍ମରଣିକାର ମଧ୍ୟ ଉନ୍ମୋଚନ କରିଥିଲେ ଅତିଥି । ଏହା ପରେ ସାଂସ୍କୃତିକ କାର୍ଯ୍ୟକ୍ରମ ଆରମ୍ଭ ହୋଇଥିଲା । ଯେଉଁଥିରେ ବଲାଙ୍ଗୀର ଜିଲ୍ଲାର ଘୁଡକା ବାଦ୍ୟ ଓ ନାଚ, ଆସାମର ବିହୁ ନୃତ୍ୟ, ଗଞ୍ଜାମର ପଶୁ ନୃତ୍ୟ ତଥା ଶଙ୍ଖ ଧ୍ବନି ନୃତ୍ୟ ଇତ୍ୟାଦି ପରିବେଷିତ ହୋଇଥିଲା । ଏହି ସବୁ ଲୋକକଳା ଲୋକଙ୍କ ହୃଦୟକୁ ବେଶ ଛୁଇଁ ଥିଲା । ତେବେ ଜିଲ୍ଲାର ଲୋକକଳା ବେଶ ଆଗୁଆ ଥିବାବେଳେ ଏହାକୁ ଏହି ମଞ୍ଚ ଲୋକଲୋଚନ ଆଣିପାରିଛି ବୋଲି ମତ ପ୍ରକାଶ ପାଇଥିଲା । ସେହିପରି କଳାକାରମାନେ ମଧ୍ୟ ଏହି ମଞ୍ଚ ପାଇ ବେଶ ଉତ୍ସାହିତ ହୋଇ ନିଜ ନୃତ୍ୟ ଗୀତ ପରିବେଷଣ କରିଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
