ବଲାଙ୍ଗୀର: ମୁଖ୍ୟ ତିନୋଟି ଦାବି ନେଇ ବୁଧବାର ପୁଣି ବଲାଙ୍ଗୀରରେ 48 ଘଣ୍ଟିଆ ବନ୍ଦ ଡାକରା ଦିଆଯାଇଛି। ବଲାଙ୍ଗୀରରେ ହାଇକୋର୍ଟ ସ୍ଥାୟୀ ବେଞ୍ଚ ସ୍ଥାପନ, ବାଇପାସ୍ ନିର୍ମାଣ ଓ ଲୋୟର ସୁକତେଲ ପ୍ରକଳ୍ପ ଶୀଘ୍ର ସମ୍ପୂର୍ଣ୍ଣ ଦାବିରେ ବଲାଙ୍ଗୀର କ୍ରିୟାଅନୁଷ୍ଠାନ କମିଟିର ନେତୃତ୍ବରେ ଏହି ବନ୍ଦ ଡାକରା ଦିଆଯାଇଛି ।
ଏଥିରେ ବଲାଙ୍ଗୀର ଜିଲ୍ଲାର ରାଜ୍ୟ ଓ କେନ୍ଦ୍ର ସରକାରଙ୍କ ସବୁ କାର୍ଯ୍ୟାଳୟ ତଥା ବ୍ୟାଙ୍କ ଓ ବୀମା କାର୍ଯ୍ୟାଳୟ ବନ୍ଦ ରଖାଯାଇଛି। ସେପଟେ ଏହି ଦୁଇ ଦିନିଆ ବନ୍ଦ ବୁଧବାର ପ୍ରଥମ ଦିନରେ ଶାନ୍ତି ଶୃଙ୍ଖଳାରେ ସଫଳ ହୋଇଥିବାବେଳେ ପୋଲିସ ପକ୍ଷରୁ କଡାସୁରକ୍ଷା ଗ୍ରହଣ କରାଯାଇଛି।
ତେବେ ଏହି ଆନ୍ଦୋଳନର ନେତୃତ୍ବ ବଲାଙ୍ଗୀର କ୍ରିୟାଅନୁଷ୍ଠାନ କମିଟି ନେଇଥିବାବେଳେ ତାକୁ ଜିଲ୍ଲାର ସବୁ ଛୋଟ ବଡ ସଙ୍ଗଠନ ସମର୍ଥନ ଦେଇ ସିଧାସଳଖ ଆନ୍ଦୋଳନରେ ସାମିଲ ହୋଇଛନ୍ତି। ସମାନ ଭାବରେ ବିଭିନ୍ନ ସଙ୍ଗଠନ ପକ୍ଷ୍ୟରୁ ବୁଧବାର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ମଧ୍ୟ ଦିଆଯାଇଛି।
ତେବେ ବୁଧବାର ମକର ସଂକ୍ରାନ୍ତି ପାଇଁ କିଛି କାର୍ଯ୍ୟାଳୟ ବନ୍ଦ ଥିବାବେଳେ ଖୋଲା ଥିବା ଜିଲ୍ଲାର ରାଜ୍ୟ ଓ କେନ୍ଦ୍ର ସରକାରଙ୍କ ସବୁ କାର୍ଯ୍ୟାଳୟ, ବୀମା କାର୍ଯ୍ୟାଳୟକୁ ବନ୍ଦ କରାଯାଇଛି। ସେପଟେ ଦୋକାନ ବଜାର, ସ୍କୁଲ, କଲେଜ ଓ ଗାଡି ଚଳାଚଳ ସ୍ବାଭାବିକ ରହିଛି।
ତେବେ ମୁଖ୍ୟ ଏହି ତିନୋଟି ଦାବି ଶୀଘ୍ର ପୂରଣ କର ବୋଲି ଆନ୍ଦୋଳନକାରୀ କେନ୍ଦ୍ର ଓ ରାଜ୍ୟ ସରକାରଙ୍କ ଠାରେ ଦାବି ରଖିଛନ୍ତି। ନହେଲେ ଆଗାମୀ ଦିନରେ ଏହି ଆନ୍ଦୋଳନ ଆହୁରି ତୀବ୍ର ହେବ ବୋଲି ଚେତାବନୀ ଦିଆଯାଇଛି। ସେପଟେ ଏହି ଦୁଇ ଦିନିଆ ବନ୍ଦ ବୁଧବାର ପ୍ରଥମ ଦିନରେ ଶାନ୍ତି ଶୃଙ୍ଖଳାରେ ସଫଳ ହୋଇଥିବାବେଳେ ପୋଲିସ ପକ୍ଷରୁ କଡାସୁରକ୍ଷା ଗ୍ରହଣ କରାଯାଇଛି।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ୍, ଇଟିଭି ଭାରତ
