ବଲାଙ୍ଗୀର: ବିଜେପି ଆଜି ବଲାଙ୍ଗୀରରେ ତାଲାବନ୍ଦ ଆନ୍ଦୋଳନ କରିଛି । ଯେଉଁଥିରେ ପାଟଣାଗଡଠାରେ ବିଜେପି କର୍ମୀମାନେ ଉପଜିଲ୍ଲାପାଳ ଓ ଏସସିଏସଓ କାର୍ଯ୍ୟାଳୟକୁ ତାଲା ମାରି ଧାରଣାରେ ବସିଛନ୍ତି । ବିଜେପି କର୍ମୀମାନେ ସେଠାକାର ଉପଜିଲ୍ଲାପାଳଙ୍କ କାର୍ଯ୍ୟାଳୟ ଓ ଉପଯୋଗାଣ ବିଭାଗ କାର୍ଯ୍ୟାଳୟକୁ ତାଲା ମାରିବା ସହ ପାଟଣାଗଡ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି ।
ତେବେ ଗତକାଲି ବିଜେପି ଚାଷୀ ଅଧିକାର ରାଲି କରି ସମ୍ବଲପୁର ଆରଡିସିଙ୍କ କାର୍ଯ୍ୟାଳୟ ଘେରାଉ କରିଥିଲେ ଏବଂ ରାତି ତମାମ ସେଠି ସେମାନେ ଧାରଣା ଦେଇଥିବା ବେଳେ ପ୍ରଶାସନ କିମ୍ବା ସରକାରଙ୍କ ପକ୍ଷରୁ କେହି ତାଙ୍କ ସହ ଆଲୋଚନା କରିବାକୁ ଆସିନଥିଲେ । ଓଲଟା କିଛି ବିଜେପି କର୍ମୀଙ୍କୁ ପୋଲିସ ସେଠାରୁ ଉଠାଇ ନେଇଥିଲା । ଏହାକୁ ବିରୋଧ କରି ତଥା ଚାଷୀ ସମସ୍ୟା ସମାଧାନ ଦାବି କରି ଆଜି ଏହି ଆନ୍ଦୋଳନ କରିଛି ବିଜେପି । ଦାବି ପୂରଣ ନହେବା ଯାଏଁ ଏମାନେ ଏହି ଧାରଣାରୁ ହଟିବେ ନାହିଁ ବୋଲି କହିଛନ୍ତି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
