ବଲାଙ୍ଗୀର: ଦୀର୍ଘ ଦିନରୁ ବନ୍ଦ ପଡି ରହିଛି ବଲାଙ୍ଗୀର ଜିଲ୍ଲାର ଜୀବନ ରେଖା କୁହାଯାଉଥିବା ଲୋୟର ସୁକତେଲ ପ୍ରକଳ୍ପ କାମ । ଏହି ପ୍ରକଳ୍ପ ପ୍ରକଳ୍ପ ଯୋଗୁଁ ବିସ୍ଥାପିତ ହେବାକୁ ଥିବା 29 ଖଣ୍ଡ ଗ୍ରାମବାସୀଙ୍କ ଉଚିତ ଥଇଥାନ ଦାବିରେ ଏହି କାମ ଦୀର୍ଘ 20 ମାସ ହେବ ସମ୍ପୂର୍ଣ୍ଣ ବନ୍ଦ ରହିଛି ।
ସେପଟେ ପ୍ରକଳ୍ପର ନିର୍ମାଣ ଖର୍ଚ୍ଚ ବଢି ବଢି ଚାଲିଥିବା ବେଳେ ଏହାର ଭାଗ୍ୟ ଅନ୍ଧାର ମଧ୍ୟକୁ ଠେଲି ହୋଇଯାଉଛି । ଏଭଳି ପରିସ୍ଥିତିରେ ସରକାର ହାତରେ ହାତ ଧରି ବସିଥିବା ବେଳେ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି । ଏବେ ପୁଣି ଏଥିପାଇଁ ଲଢେଇ କରୁଥିବା ବଲାଙ୍ଗୀର ଆକ୍ସନ କମିଟି ଆନ୍ଦୋଳନ କରିବାକୁ ନିଷ୍ପତ୍ତି ନେଇଛି । ବିସ୍ଥାପିତଙ୍କୁ ଉଚିତ ଥଇଥାନ ସହ ପ୍ରକଳ୍ପ କାମ ସମାପନ ପାଇଁ ଆସନ୍ତା ସୋମବାରରୁ ସଂଗଠନ ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅନଶନ ଆନ୍ଦୋଳନ କରାଯିବ ।
ଏହି ଆନ୍ଦୋଳନରେ ବଲାଙ୍ଗୀରର 38ଗୋଟି ସଂଗଠନ ସିଧାସଳଖ ସାମିଲ ହେବା ସହ ଅନିର୍ଦ୍ଦିଷ୍ଟ କାଳ ପାଇଁ ଏହି ଆନ୍ଦୋଳନ ଚାଲିବ ବୋଲି ସଂଗଠନ ପକ୍ଷରୁ କୁହାଯାଇଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ