ବଲାଙ୍ଗୀର :ଏକ ଭଡା ଘରୁ ଜଣେ ଡାକ୍ତରଙ୍କ ମୃତଦେହ ଉଦ୍ଧାର । ଏନେଇ ଘଟଣାର ତଦନ୍ତ କରୁଛି ବଲାଙ୍ଗୀର ପୋଲିସ । ସ୍ଥାନୀୟ ରାଜୀବନଗରରେ ରାଧାଗୋବିନ୍ଦ ପଟ୍ଟନାୟକଙ୍କ ଘରେ ଭଡ଼ା ରହୁଥିବା ଆୟୁର୍ବେଦିକ ଡାକ୍ତର ରାଜ ଭରଦ୍ୱାଜଙ୍କ ସନ୍ଦେହଜନକ ଭାବେ ମୃତ୍ୟୁ ଘଟିଛି । ଟାଉନ୍ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଘର ମାଲିକଙ୍କ ସୂଚନା ଅନୁସାରେ , ଗତ ୨୩ ତାରିଖ ଦିନ ସେ ଭଡ଼ାରେ ରହିବା ପାଇଁ ତାଙ୍କ ସହ କଥା ହୋଇଥିଲେ । ଏଥିସହ ଘର ବୁଲି ଦେଖିବା ସହ ଘର ଭଡା ନେବେ ବୋଲି ସେ କହିଥିଲେ। ସେହିପରି ସେ ତାଙ୍କ ଆଧାର କାର୍ଡ ମଧ୍ୟ ପ୍ରଦାନ କରିଥିଲେ । ଆଧାର କାର୍ଡ ଅନୁସାରେ ତାଙ୍କ ନାମ ରାଜ ଭରଦ୍ୱାଜ । ସେ ଗୌଡସାହି, ନବରଙ୍ଗପୁର ନିବାସୀ ବୋଲି ଜଣା ପଡ଼ିଥିଲା । ତେବେ ଗତକାଲି ସେ ତାଙ୍କର ସାମାନପତ୍ର ଧରି ଭଡା ଘରକୁ ରହିବା ପାଇଁ ଆସି ରାତିରେ ଶୋଇଥିଲେ ।
କିନ୍ତୁ ଆଜି ସକାଳୁ ଦିନ ୧୧ଟା ପର୍ଯ୍ୟନ୍ତ ସେ କବାଟ ଖୋଲି ନ ଥିଲେ । ତେବେ କବାଟ ଭିତର ପଟୁ ବନ୍ଦ ଥିବା ବେଳେ ଘର ମାଲିକ ସନ୍ଦେହରେ ଟାଉନ୍ ଥାନାରେ ଲିଖିତ ଅଭିଯୋଗ କରିଥିଲେ। ଯାହାପରେ ବଲାଙ୍ଗୀର ଟାଉନ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା । ସେହିପରି ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ କବାଟ ଭାଙ୍ଗି ଡାକ୍ତରଙ୍କ ମୃତଦେହ ଉଦ୍ଧାର କରିଥିଲେ । ତେବେ ସଂପୃକ୍ତ ଡାକ୍ତର ଜଣକ ଶୋଇବା ଅବସ୍ଥାରେ ତାଙ୍କର ମୃତ୍ୟୁ ହୋଇଥିବାର ସନ୍ଦେହ କରା ଯାଇଛି । ତାଙ୍କ ମୃତ୍ୟୁ ହୃଦଘାତ ଜନିତ ହୋଇଥାଇ ପାରେ ବୋଲି ସନ୍ଦେହ କରା ଯାଉଛି । ଅନ୍ୟପଟେ ମୃତଦେହ ବ୍ୟବଚ୍ଛେଦ ପରେ ମୃତ୍ୟୁର କାରଣ ଜଣା ପଡ଼ିବ ବୋଲି ପୋଲିସ୍ ସୂଚନା ଦେଇଛି ।
ପ୍ରକାଶ ଥାଉକି, ବାଲେଶ୍ବର ଜିଲ୍ଲା ଫକୀର ମୋହନ ମେଡିକାଲ କଲେଜରୁ ମଧ୍ୟ ସାମ୍ନାକୁ ଆସିଛି ଏକ ଦୁଃଖଦ ଘଟଣା । ଡାକ୍ତର ହେବାର ସ୍ୱପ୍ନ ପୂରଣ ହେବା ଆଗରୁ ଚରମ ନିଷ୍ପତ୍ତି ନେଲେ ତୃତୀୟ ବର୍ଷ ଡାକ୍ତରୀ ଛାତ୍ର ହିତେଷ୍ଣୁ ଦାସ । ଗତକାଲି ବିଳମ୍ବିତ ରାତିରେ ଏଭଳି ଘଟଣା ଘଟିଥିବା ବେଳେ ତଦନ୍ତ ଆରମ୍ଭ କରିଛି ପୋଲିସ । ଗତକାଲି ନାଇଟ-ସୋ' ସିନେମା ଦେଖି ସାଙ୍ଗଙ୍କ ସହିତ ହଷ୍ଟେଲ ଫେରିଥିଲେ ହିତେଷ୍ଣୁ । ବାପାଙ୍କୁ ଆଇ ଲଭ୍ ୟୁ ମେସେଜ୍ ଦେବା ପରେ ପ୍ରାଣ ହରାଇଥିବା ସୂଚନା ମିଳିଛି । ତେବେ କେଉଁ କାରଣ ପାଇଁ ଯୁବକ ଜଣକ ଏଭଳି ଚରମ ନିଷ୍ପତ୍ତି ନେଇଛନ୍ତି, ସେନେଇ ସ୍ପଷ୍ଟ ହୋଇନାହିଁ । ହଷ୍ଟେଲ୍ରେ କିଛି ଗୋଟିଏ ବଡ଼ ଶବ୍ଦ ହେବାରୁ ତାଙ୍କ ସାଙ୍ଗସାଥି ଆସି ଦେଖିଥିଲେ ହିତେଷ୍ଣୁ ହଷ୍ଟେଲ୍ ତଳେ ପଡ଼ିଥିଲେ । ହିତେଷ୍ଣୁଙ୍କୁ ସଙ୍ଗେସଙ୍ଗେ ହସ୍ପିଟାଲରେ ଭର୍ତ୍ତି କରିଥିଲେ । କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଇଟିଭି ଭାରତ, ବଲାଙ୍ଗୀର
