ବାଲାଙ୍ଗୀର: ଉଚ୍ଛେଦ ହେବ ବଲାଙ୍ଗୀରର 100 ବର୍ଷର ସର୍ବ ପୁରାତନ ରାଧା କୃଷ୍ଣ ମନ୍ଦିର । ଏନେଇ ପ୍ରଶାସନ ପକ୍ଷରୁ ନୋଟିସ ଲାଗିବା ପରେ ମନ୍ଦିର ଭାଙ୍ଗିବାକୁ ଦିଆ ଯିବ ନାହିଁ ବୋଲି ବିରୋଧ ପ୍ରଦର୍ଶନ କରାଯାଇଛି । ବଡ ଆନ୍ଦୋଳନର ଚେତାବନୀ ଦେଇଛନ୍ତି ବଲାଙ୍ଗୀରବାସୀ । ଏହି ମନ୍ଦିର ସହ ଲୋକଙ୍କ ଭାବ ବେଗ ଜଡ଼ିତ ଥିବା ବେଳେ ଏହି ମନ୍ଦିର ନାଁରେ ଏକ ପୁରାତନ ପଡା ମଧ୍ୟ ନାମିତ ହୋଇଛି ।
ବଲାଙ୍ଗୀର ଭୀମଭୋଇ ମେଡ଼ିକାଲ କଲେଜ ଡାକ୍ତରଖାନା ସମ୍ମୁଖରେ ଥିବା ସର୍ବ ପୂରାତନ ରାଧାକୃଷ୍ଣ ମନ୍ଦିର ଉଚ୍ଛେଦ ପାଇଁ ପ୍ରଶାସନ ପକ୍ଷରୁ ନୋଟିସ ଦିଆ ଯାଇଛି । ଯାହାକୁ ନେଇ ବଲାଙ୍ଗୀରବାସୀ ତୀବ୍ର ବିରୋଧ କରିବା ସହ କୌଣସି ମତେ ମନ୍ଦିର ଭାଙ୍ଗିବାକୁ ଦିଆ ଯିବ ନାହିଁ ବୋଲି ଲୋକେ କହିଛନ୍ତି । 7 ଦିନ ମଧ୍ୟରେ ମନ୍ଦିର ଉଚ୍ଛେଦ କରିବାକୁ ପ୍ରସାଶନ ତରଫରୁ ନୋଟିସ ଜାରି ହୋଇଛି । ଏହି ନୋଟିସ ପାଇବା ପରେ ବଲାଙ୍ଗୀର ଲୋକଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ପ୍ରଶାସନ କଳାପାହାଡ଼ ନୀତି ଅବଲମ୍ବନ କରି ଐତିହ୍ୟ ସମ୍ପର୍ଣ୍ଣ ଏହି ମନ୍ଦିରକୁ ପର୍ଯ୍ୟାୟ କ୍ରମେ ଉଚ୍ଛେଦ କରିବାର ମସୁଧା କରୁଥିବାର ଅଭିଯୋଗ ହୋଇଛି ।
ବୁଧବାର ବଲାଙ୍ଗୀରର ସମସ୍ତ ସଂଗଠନ ଓ ସାଧାରଣ ଲୋକେ ମନ୍ଦିରରେ ଏକ ବୈଠକ କରି ଏହାକୁ ତୀବ୍ର ନିନ୍ଦା କରିବା ସହ ବିରୋଧ କରିଥିଲେ । ଆଗାମୀ ଦିନରେ ଏଥିପାଇଁ ବଲାଙ୍ଗୀର ବନ୍ଦ ଭଳି ବଡ ଆନ୍ଦୋଳନ କରାଯିବ ବୋଲି ଏମାନେ ନିଷ୍ପତ୍ତି ନେଇଛନ୍ତି । ବଜରଙ୍ଗ ଦଳର ସଭାପତି କାହ୍ନୁ ଶତପଥି କହିଛନ୍ତି ଯେ, ପ୍ରଶାସନ ଏବେ କଳା ପାହାଡ଼ ନୀତି ଅବଲମ୍ବନ କରିଛି । ସର୍ବ ପୁରାତନ ଏହି ମନ୍ଦିରକୁ ପର୍ଯ୍ୟାୟ କ୍ରମେ ଉଚ୍ଛେଦ କରିବାର ପ୍ରୟାସ ଆରମ୍ଭ କରିଛି। କିନ୍ତୁ ଏହାକୁ ଉଚ୍ଛେଦ କରିବାକୁ ଦେବେ ନାହିଁ ବଲାଙ୍ଗୀରବାସୀ । ପୁରୁଣା ଐତିହ୍ୟ ସମ୍ପର୍ଣ୍ଣ ମନ୍ଦିରର ପୁନରୁଦ୍ଧାର ସରକାର କରୁଥିବା ବେଳେ ଏହି ମନ୍ଦିର ଭାଙ୍ଗିବାର ହୀନ ପ୍ରୟାସ ହେଉଛି ବୋଲି କହିଛନ୍ତି ବଜରଙ୍ଗ ଦଳର ସଭାପତି ।
ଏହା ମଧ୍ୟ ପଢନ୍ତୁ-ଯୋରନ୍ଦା ମହିମା ମନ୍ଦିର ଉଚ୍ଛେଦ ଘଟଣା, ଗର୍ଜିଲେ ମହିମା ସନ୍ଥ
ବଲାଙ୍ଗୀରର ଦତ୍ତାନନ୍ଦ ପଣ୍ଡା କହିଛନ୍ତି ଯେ, ବଲାଙ୍ଗୀରରେ ଏହି ମନ୍ଦିର ସ୍ଥାପନ ପାଇଁ ରାଜାଙ୍କଠୁ 1911 ମସିହା ରେ ଜମି ମିଳିଥିଲା । ଏଠି ରାଧାକୃଷ ବିଗ୍ରହ ସ୍ଥାପନ ସହ ମନ୍ଦିର ତିଆରି ହୋଇଥିଲା । ସେହିପରି ସେ ସମୟର ସମାଜସେବୀ ରାମଗୋପାଲଙ୍କୁ ଏହି ଜମି ପ୍ରଦାନ କରା ଯାଇଥିଲା । ତେବେ ପରବର୍ତ୍ତୀ ସମୟରେ ସେହି ସମାଜସେବୀ ରାମଗୋପାଳ ଏଠି ଏକ ଡାକ୍ତରଖାନା ସ୍ଥାପନ ପାଇଁ ଜମି ଦାନ କରିଥିଲେ । ଯେଉଁଥିରେ ମୁଖ୍ୟ ଡାକ୍ତରଖାନା ସହ ସ୍ତ୍ରୀ ଓ ପ୍ରସୂତି ବିଭାଗ ସ୍ଥାପିତ ହୋଇଥିଲା । ଏହା ସହ ଏହାକୁ ସଂଲଗ୍ନ ସେ ସ୍କୁଲ ପାଇଁ ମଧ୍ୟ ଜମି ପ୍ରଦାନ କରିଥିଲେ । ଯାହା ଉପରେ ରାମଗୋପାଳ ହିନ୍ଦୀ ଉଚ୍ଚ ବିଦ୍ୟାଳୟ ସ୍ଥାପିତ ହୋଇଥିଲା । ସେ ସମୟର ଡାକ୍ତରଖାନା ଏବେ ଭୀମଭୋଇ ମେଡ଼ିକାଲ କଲେଜ ଡାକ୍ତରଖାନାରେ ରୂପାନ୍ତରିତ ହୋଇଛି । 1936 ବନ୍ଦୋବସ୍ତ ପ୍ସର୍ଯ୍ୟନ୍ତ ଏହି ସବୁ ଜମି ମନ୍ଦିର ନାଁରେ ଥିଲା । ହେଲେ 1976 ବନ୍ଦୋବସ୍ତରେ ଏହା ସରକାରୀ ଖାତାକୁ ଚାଲି ଯାଇଥିଲା । ଏବଂ ଏବେ ଭୀମଭୋଇ ମେଡ଼ିକାଲ କଲେଜ ଡାକ୍ତରଖାନାର ଉନ୍ନତି ନାଁରେ ଏହାକୁ ଉଚ୍ଛେଦ କରିବାକୁ ଜିଲ୍ଲା ପ୍ରଶାସନ ପଦକ୍ଷେପ ନେଇଛି । ତହସିଲଦାରଙ୍କ ରିପୋର୍ଟ ଅନୁସାରେ ଏହି ସରକାରୀ ଜାଗା ଖାଲି କରିବାକୁ ନୋଟିସ ଦିଆଯାଇଛି ବୋଲି ସେ କହିଛନ୍ତି ।
ପୂର୍ବରୁ ପ୍ରଥମେ ଧର୍ମଶାଳା ଓ ମନ୍ଦିର ବାଡ ସବୁ ଉଚ୍ଛେଦ ହୋଇ ସାରିଛି । ଏବେ ମନ୍ଦିର ମଧ୍ୟରେ ଥିବା ଘର ସବୁକୁ ଉଚ୍ଛେଦ କରାଯିବାକୁ ପ୍ରୟାସ ହେଉଛି ଵୋଲି ସେ ଅଭିଯୋଗ ଆଣିଛନ୍ତି ଆନ୍ଦୋଳନକାରୀ । ଯାହାକୁ ସମସ୍ତେ କଠୋର ଭାବରେ ବିରୋଧ କରିବେ ଓ ମନ୍ଦିର କୌଣସି ମତେ ଭାଙ୍ଗିବାକୁ ଦିଆ ଯିବ ନାହିଁ ବୋଲି କହିଛନ୍ତି ଦତ୍ତାନନ୍ଦ ପଣ୍ଡା । ସେପଟେ ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ ସ୍ଥାନୀୟ ବାସିନ୍ଦାଙ୍କ ସହ ମନ୍ଦିର ଯାଇ ଆଲୋଚନା କରିଥିଲେ । ଏହା ପ୍ରଶାସନର ନିଷ୍ପତ୍ତି ହୋଇଥିବା ବେଳେ ପୌର ପରିଷଦ କାଉନସିଲର ଏହାକୁ ବିରୋଧ କରିବ ଓ କୌଣସି ମତେ ଉଚ୍ଛେଦ ହେବାକୁ ଦିଆଯିବ ନାହିଁ ବୋଲି କହିଛନ୍ତି ।
ଇଟିଭି ବାରତ, ବାଲାଙ୍ଗୀର
