ବଲାଙ୍ଗୀର: ଦେଶରେ କୋରୋନାର ବିଭିନ୍ନ ସମୟରେ କରୁଣ ଚିତ୍ର ସାମନାକୁ ଆସୁଥିବା ବେଳେ ବଲାଙ୍ଗୀରରେ ମଧ୍ୟ ଏକ ଘଟଣା ଏବେ ସମସ୍ତଙ୍କୁ ଚିନ୍ତା କରିବାକୁ ବାଧ୍ୟ କରିଛି । ଏଠି କୋରୋନାରେ ମୃତ୍ୟୁ ପରେ ନିଜ ଗାଁରେ ଅନ୍ତିମ ସଂସ୍କାର ପାଇଁ ଲୋକେ ମନା କରିବାରୁ ଜଣେ ପୁଅ ନିଜର ବାପାର ମୃତଦେହ ଧରି ହଇରାଣ ହୋଇଛି ।
ସୂଚନା ଅନୁସାରେ ବଲାଙ୍ଗୀର ସଇଁତଳା ବ୍ଲକର ଦେଢେଲ ଗ୍ରାମର ଘନଶ୍ୟାମ ସାହୁଙ୍କ ବାପା ଅନାର୍ଯ୍ୟ ସାହୁ କୋରୋନା ସଂକ୍ରମିତ ହୋଇ ଗୁରୁତର ହୋଇଥିଲେ ଏବଂ ତାଙ୍କର ଚିକିତ୍ସା ପାଇଁ ସେ ବଲାଙ୍ଗୀର ଭୀମ ଭୋଇ ମେଡିକାଲ କଲେଜରେ ତାଙ୍କୁ ଭର୍ତ୍ତି କରିଥିଲେ । ତେବେ ଆଜି ଚିକିତ୍ସାଧୀନ ଅବସ୍ଥାରେ ତାଙ୍କର ଏଠି ମୃତ୍ୟୁ ହୋଇଥିଲା । ସେପଟେ ପୁଅ ଜଣକ ମୃତଦେହ ନେଇ ଗାଁକୁ ଯିବାକୁ ଥିବାବେଳେ ଗ୍ରାମବାସୀ ତାଙ୍କୁ ମୃତଦେହ ଆଣିବା ପାଇଁ ରୋକଠୋକ ମନା କରିଥିଲେ । ଯାହାଫଳରେ ଦୀର୍ଘ ଘଣ୍ଟା ଧରି ପୁଅ ତା ବାପାର ମୃତଦେହ ଧରି ହଇରାଣ ହୋଇଥିଲେ ।
ସେପଟେ ଏହାର ଖବର ବଲାଙ୍ଗୀରର ସ୍ଵେଚ୍ଛସେବୀ ସଂଗଠନ ବି ହ୍ୟୁମାନ ପାଇବା ପରେ ସବୁ ସତର୍କତା ଅବଲମ୍ବନ କରି ଶେଷରେ ବଲାଙ୍ଗୀର ଆରଟିଓ କାର୍ଯ୍ୟାଳୟ ନିକଟ ଶ୍ମଶାନରେ ତାଙ୍କର ମୃତଦେହ ଦାହ କରିଥିଲେ । ତେବେ ବଲାଙ୍ଗୀରରେ କରୋନା ଲୋକଙ୍କ ମଧ୍ୟରେ ଭୟ ସୃଷ୍ଟି କରିଥିବା ବେଳେ ଲୋକେ ଏହି ଭଳି ଆଚରଣ କରୁଥିବାର ଏବେ ଚିନ୍ତା ବଢ଼ାଇଛି ।
ବଲାଙ୍ଗୀରରୁ ଶେଖ ମହମ୍ମଦ ଓ୍ବାହୀଦ, ଇଟିଭି ଭାରତ
