ବଲାଙ୍ଗୀର: ଲାଞ୍ଚ ମାଗି ନିଲମ୍ବିତ ହେଲେ ବଲାଙ୍ଗୀର ସଇଁତଳା ଥାନା ଏଏସଆଇ । ମୋ ସରକାର କାର୍ଯ୍ୟକ୍ରମରେ ତଦନ୍ତ କରି ନିଲମ୍ବନ କଲେ ଏସପି । ଏତଲାକରୀଙ୍କୁ କୁକୁଡା ଓ ଅଣ୍ଡା ଲାଞ୍ଚ ମାଗିଥିଲେ ଜଗଦୀଶ ମହାନନ୍ଦ ।
ବଲାଙ୍ଗୀର ସଇଁତଳା ଥାନାରେ ଏହି ଘଟଣାକୁ ନେଇ ବର୍ତ୍ତମାନ ଖୁବ ଚର୍ଚ୍ଚା ଚାଲିଛି । ଦୁଇ ଦିନ ତଳେ ସଇଁତଳାର ଅଣ୍ଡା ଦୋକାନ କରିଥିବା ଆଶିଷ ସାହୁଙ୍କ ସହ ଅନ୍ୟ ଜଣେ ବ୍ୟକ୍ତିଙ୍କର ଝଗଡ଼ା ହୋଇଥିଲା । ଯାହାକୁ ନେଇ ଦୁଇ ପକ୍ଷ ଥାନାରେ ଲିଖିତ ଅଭିଯୋଗ କରିଥିଲେ । ତେବେ ମାମଲାର ଦାୟିତ୍ଵରେ ଥିବା ପୋଲିସ ଏଏସଆଇ ମାମଲା ରୁଜୁ କରିବା ପାଇଁ ଅଣ୍ଡା ଦୋକାନୀ ଆଶିଷ ସାହୁଙ୍କୁ ଅଣ୍ଡା ଓ କୁକୁଡା ଲାଞ୍ଚ ମାଗିଥିବାର ଅଭିଯୋଗ ହୋଇଥିଲା ।
ସେପଟେ 5 ଟି ମୋ ସରକାର ଯୋଜନାରେ ଆଶିଷ ପାଖକୁ ଫୋନ ଆସିଥିବା ବେଳେ ଆଶିଷ ଏହି ଅଭିଯୋଗ କରିଥିଲେ । ଯାହାପରେ ବଲାଙ୍ଗୀର ଏସପି ପଦକ୍ଷେପ ନେଇ ସଂପୃକ୍ତ ଅଭିଯୁକ୍ତ ଏଏସଆଇ ଜଗଦୀଶ ମହାନନ୍ଦଙ୍କୁ ନିଲମ୍ବନ କରିଛନ୍ତି । ଏହି ଘଟଣାକୁ ନେଇ ଏବେ ସବୁଠି ଚର୍ଚ୍ଚା ହୋଇଥିବା ବେଳେ ଦୁର୍ନୀତିଗ୍ରସ୍ତ ଅଧିକାରୀଙ୍କ ପାଇଁ ଏହା ଏକ ଶିକ୍ଷା ବୋଲି ସବୁଠି କୁହାଯାଇଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
