ବଲାଙ୍ଗୀର: ଜମି ବିବାଦକୁ କେନ୍ଦ୍ରକରି ଦୁଇ ପରିବାର ମଧ୍ୟରେ ଗୁଳିକାଣ୍ଡ । ଗୁଳିକାଣ୍ଡରେ ଦୁଇ ଜଣ ଆହତ ହୋଇଛନ୍ତି । ଏପରି ଅଭାବନୀୟ ଘଟଣା ବଲାଙ୍ଗୀର ସଦର ଥାନା ଅନ୍ତର୍ଗତ ସଦେଇ ପାଲି ଗ୍ରାମରେ ଘଟିଛି । ସଦେଇ ପାଲି ଗ୍ରାମର ପଟ୍ଟନାୟକ ପରିବାର ଓ ସାଏ ପରିବାର ମଧ୍ୟରେ ଏକ ଜମିକୁ କେନ୍ଦ୍ରକରି ଦୀର୍ଘଧରି ବିବାଦ ଲାଗିରହିଥିଲା । ଗୋଟିଏ ଜମିକୁ ଉଭୟ ପରିବାର ଲୋକେ ନିଜର ବୋଲି ଦାବି କରୁଥିଲେ । ଏହାକୁ ନେଇ ଉଭୟ ପରିବାର ମଧ୍ୟରେ କଳହ ଲାଗି ରହିଥିବା ବେଳେ ଗତକାଲି ଜମିର ସୀମା ଚିହ୍ନଟ ସମୟରେ ଏପରି ଅଭାବନୀୟ ଘଟଣା ଘଟିଥିବା ଦେଖିବାକୁ ମିଳିଛି ।
ଅଧିକ ପଢ଼ନ୍ତୁ: ମହିଳା କ୍ରିକେଟର ରାଜଶ୍ରୀ ମୃତ୍ୟୁ ଘଟଣା: ଉଚ୍ଚ ସ୍ତରୀୟ ତଦନ୍ତ ଦାବି କଲା ବିଜେପି
ତେବେ ସୂଚନା ଅନୁଯାୟୀ ଜମିର ଗତକାଲି ସୀମା ଚିହ୍ନଟ ଚାଲିଥିଲା ସମୟରେ ଉପସ୍ଥିତ ଥିବା ପଟ୍ଟନାୟକ ପରିବାର ଓ ସାଏ ପରିବାର ମଧ୍ୟରେ ବିବାଦ ହୋଇଥିଲା । ତେବେ ବିବାଦ ପରବର୍ତ୍ତୀ ସମୟରେ ଗଣ୍ଡଗୋଳର ରୂପ ନେଇଥିବା ବେଳେ ଗୁଳିକାଣ୍ଡ ଘଟିଥିଲା । ଯେଉଁଥିରେ ପଟ୍ଟନାୟକ ପରିବାରର ସୋନୁ ପଟ୍ଟନାୟକଙ୍କ ଡାହାଣ କାନ୍ଧରେ ଗୁଳି ବାଜିଥିଲା । ସେହିପରି ଏହି ଗଣ୍ଡଗୋଳରେ ଆଉ ଜଣେ ମଧ୍ୟ ଆହତ ହୋଇଥିଲେ । ତେବେ ସମସ୍ତ ଆହତଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲରେ ଭର୍ତ୍ତି କରାଯାଇ ତାଙ୍କର ଚିକିତ୍ସା ଚାଲିଛି ।
ଅଧିକ ପଢ଼ନ୍ତୁ: ପୂର୍ବ ଶତ୍ରୁତାରୁ ରାଗ ସୁଝାଇଲେ ଅଭିଯୁକ୍ତ, ହତ୍ୟା କରି ପୋତି ଦେଇଥିଲେ
ତେବେ ଆହତ ସୋନୁ ପଟ୍ଟନାୟକ ନିଜ କିଛି ସହଯୋଗୀ ସହ ସେହି ବିବାଦୀୟ ଜମି ସୀମା ଚିହ୍ନଟ ପାଇଁ ଅମିନଙ୍କୁ ନେଇ ସେଠାକୁ ଯାଇଥିଲେ । ଏବଂ ସେଠି ମାପଚୁପ କରୁଥିବା ବେଳେ ସାଏ ପରିବାରର ଲୋକ ଅତର୍କିତ ଭାବରେ ଆସି ତାଙ୍କ ଉପରକୁ ଆକ୍ରମଣ କରିଥିବା ବେଳେ ଟିକୁ ସାଏ ତାଙ୍କ ଉପରକୁ ଗୁଳି କରିଥିବାର ସୋନୁ କହିଛନ୍ତି ।
ଅନ୍ୟପଟେ ବଲାଙ୍ଗୀର ସଦର ପୋଲିସ୍ ଏହି ଘଟଣା ପରେ ଘଟଣାସ୍ଥଳ ରେ ପହଞ୍ଚି ତଦନ୍ତ ଆରମ୍ଭ କରିଛି । ଦୁଇ ପକ୍ଷରୁ ଅଭିଯୋଗ ହୋଇଥିବା ବେଳେ ଦୁଇ ପକ୍ଷର ସାତ ଜଣଙ୍କୁ ପୋଲିସ୍ ଅଟକ ରଖି ତଦନ୍ତ ଜାରି ରଖିଥିବା ବଲାଙ୍ଗୀର ଏସଡିପିଓ ତୁଫାନ ବାଗ କହିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
