ସଚିବଙ୍କ ପାଇଁ ଚୌକି ପକାଉଛନ୍ତି ନେତା ଅନୁଗୋଳ: ଓଡ଼ିଶାର ଶାସନ ବ୍ୟବସ୍ଥା ଭୁଶୁଡି ପଡ଼ିଛି । ଯେଉଁମାନଙ୍କୁ ସାଧାରଣ ଜନତା ଭୋଟ ଦେଇ ନିର୍ବାଚିତ କରିଥିଲେ ସେମାନେ ଦେଖା ଦେଉନାହାନ୍ତି । ଏଠି MLA ଆଉ MPଙ୍କର ଦେଖା ମିଳୁନାହିଁ । ଆଜି ଅନୁଗୋଳ ଗସ୍ତର ତୃତୀୟ ଦିନରେ ଓଡ଼ିଶାର ଶାସନ ବ୍ୟବସ୍ଥାକୁ ଆକ୍ଷେପ କରି ଏଭଳି କହିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଜିଲ୍ଲାର ଛେଦଣ୍ଡିଦାଠାରେ ଗରିବ କଲ୍ୟାଣ ସମାବେଶ ରାଜ୍ୟ ସରକାରଙ୍କୁ ଏଭଳି ସମାଲୋଚନା କରିଛନ୍ତି ଧର୍ମେନ୍ଦ୍ର ।
ଆଜି ଅନୁଗୋଳ ଜିଲ୍ଲାର ଛେଣ୍ଡିପଦାଠାରେ ଆୟୋଜିତ ଗରିବ କଲ୍ୟାଣ ସମାବେଶରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସିଧାସଳଖ ରାଜ୍ୟ ସରକାର ଓ ରାଜ୍ୟରେ ଚାଲିଥିବା ଶାସନ ବ୍ୟବସ୍ଥାକୁ ଟାର୍ଗେଟ କରିଥିଲେ । ସେ କହିଥିଲେ, " ବର୍ତ୍ତମାନ ସାରା ଓଡ଼ିଶାରେ ଏକ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି। ସାମ୍ବିଧାନିକ ବ୍ୟବସ୍ଥା ଭୁଶୁଡି ପଡ଼ିଛି । ଯେଉଁମାନେ ଲୋକମାନଙ୍କଠାରୁ ଭୋଟ ପାଇ ନିର୍ବାଚିତ ହୋଇଛନ୍ତି ସେମାନେ ଏବେ ବାବୁମାନଙ୍କର ଚୌକି ଉଠାଉଛନ୍ତି । ବାବୁମାନଙ୍କ ପାଇଁ ସଭା ସମିତି ଆୟୋଜନ କରୁଛନ୍ତି । ଏଭଳି ଓଲଟା ଶାସନ ବ୍ୟବସ୍ଥା ପୃଥିବୀରେ କୋଉ ଅଞ୍ଚଳରେ ଦେଖିବାକୁ ମିଳିବ ନାହିଁ। ତେଣୁ ଏଭଳି ବ୍ୟବସ୍ଥାରେ ଲୋକଙ୍କ କଥା କିଏ ବୁଝିବ ?"
ଏହା ବି ପଢନ୍ତୁ- 5T ସଚିବଙ୍କୁ ନେଇ ମୁଖ୍ୟମନ୍ତ୍ରୀଙ୍କୁ ୫ଟି ପ୍ରଶ୍ନ, ବିଜେପିକୁ ବି ଛାଡ଼ିଲାନି କଂଗ୍ରେସ
ସେ ଆହୁରି କହିଛନ୍ତି, "ଏଠାରେ ପିଇବା ପାଣି ନାହିଁ । ବିଜୁଳି କାଟ ହେଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଖଣି ରାଜସ୍ବକୁ ୫୦ହଜାର କୋଟିକୁ ବଢ଼ାଇଛନ୍ତି । ହଜାର ହଜାର କୋଟି ଟଙ୍କା ବିଭିନ୍ନ ଉନ୍ନୟନ କାର୍ଯ୍ୟ ପାଇଁ କେନ୍ଦ୍ର ଦେଉଛି । ୫୦ଭାଗ ପିସି କାରବାର ହେଉଛି । ସରକାର ଅନ୍ୟ କାହାକୁ ଟେକି ଦିଆଯାଇଛି । ମୁଖ୍ୟମନ୍ତ୍ରୀଙ୍କ ଦେଖାନାହିଁ । ମନ୍ତ୍ରୀ ମଣ୍ଡଳ ସଦସ୍ୟମାନଙ୍କ ସୋର ଶବ୍ଦ ନାହିଁ । ବିଧାୟକ ଓ ସାଂସଦମାନଙ୍କ କଥା ନ କହିବା ଭଲ। ଏଠାକାର ଶାସନ ବ୍ୟବସ୍ଥା ଭୁଶୁଡ଼ି ଯାଇଥିବା କାରଣରୁ ଓଡ଼ିଶାରେ ଏକଦମ ଖରାପ ପରିସ୍ଥିତି ସୃଷ୍ଟି ହୋଇଛି ।"
ତେଣୁ ଏଥିପାଇଁ ବ୍ୟାପକ ଜନ ଆନ୍ଦୋଳନ କରିବାକି ବିଜେପି ପ୍ରସ୍ତୁତ ହେଇଥିବା କଥା ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର । ଆଗାମୀ ଦିନରେ ପୁଣି ଥରେ ନରେନ୍ଦ୍ର ମୋଦିଙ୍କୁ ଦେଶର ପ୍ରଧାନମନ୍ତ୍ରୀ କରିବାକୁ ହେଲେ ଏଠାକାର ସାଂସଦମାନଙ୍କୁ ଭୋଟ ଦେଇ ଜିତାଇବାକୁ ଲୋକଙ୍କୁ ଅନୁରୋଧ କରିଥିଲେ । ସଭା ପୂର୍ବରୁ କେନ୍ଦ୍ରମନ୍ତ୍ରୀ ଛେଣ୍ଡିପଦା ମାଉସୀ ମା' ମନ୍ଦିରକୁ ଯାଇ ତିନି ଠାକୁରଙ୍କୁ ଆଡ଼ପ ମଣ୍ଡପରେ ଦର୍ଶନ କରିଥିଲେ । ଏହି କାର୍ଯ୍ୟକ୍ରମରେ ରାଜ୍ୟ ସମ୍ପାଦକ କାଳନ୍ଦୀ ସାମଲ, ପୂର୍ବତନ ସାଂସଦ ରୁଦ୍ର ନାରାୟଣ ପାଣି, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଅଶୋକ ମହାନ୍ତି, ପ୍ରତାପ ପ୍ରଧାନଙ୍କ ସମେତ ବହୁ ଦଳୀୟ ନେତା ଉପସ୍ଥିତ ଥିଲେ।
ଇଟିଭି ଭାରତ, ଅନୁଗୋଳ
