ଅନୁଗୋଳ: ଅନୁଗୋଳ କୁମଣ୍ଡ ହାଇସ୍କୁଲ ନିକଟରେ ଦୁର୍ଘଟଣା । ସ୍କୁଲଛାତ୍ରୀଙ୍କ ଉପରେ ମାଡିଗଲା ଟ୍ରକ । ମୃତ ଛାତ୍ରୀ କୁମଣ୍ଡ ଗାଁର ଅରୁଣ ସାହୁଙ୍କ ଝିଅ ଅର୍ଚ୍ଚନା ସାହୁ । ସେ କୁମଣ୍ଡ ଜାରସିଙ୍ଗା ସ୍କୁଲରେ ଦଶମ ଶେଣୀରେ ପାଠ ପଢୁଥିଲେ ।
ଦୁର୍ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖା ଦେଇଛି । ଉତ୍ତ୍ୟକ୍ତ ଲୋକେ ଟ୍ରକ ଡ୍ରାଇଭରକୁ ବନ୍ଦୀ କରି ନିସ୍ତୁକ ମାଡ ମାରିବା ସହ ଅଟକ ରଖିଛନ୍ତି । ଏଥିସହିତ ମଝି ରାସ୍ତାରେ ଟାୟାର ଜାଳି ରାସ୍ତା ଅବରୋଧ କରିବା ସହ ଟ୍ରକ ଭଙ୍ଗାରୁଜା କରିଛନ୍ତି ।
ସୂଚନାନୁସାରେ ଅର୍ଚ୍ଚନା ପ୍ରିଟେଷ୍ଟ ପରୀକ୍ଷା ଦେଇ ଫେରୁଥିଲା । ଏହି ସମୟରେ ଛେଣ୍ଡିପଦା ଆଡୁ ଆସୁଥିବା ଏକ ଟ୍ରକ ତା' ଉପରେ ମାଡି ଯାଇଥିଲା । ଗୁରୁତର ଅର୍ଚ୍ଚନାକୁ ଚିକିତ୍ସା ପାଇଁ ଅନୁଗୋଳ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ସେଠାରେ ଚିକିତ୍ସାଧୀନ ଅବସ୍ଥାରେ ତାର ମୃତ୍ୟୁ ହୋଇଥିଲା । ଯାହାକୁ ନେଇ ଦୁର୍ଘଟଣାସ୍ଥଳରେ ଉତ୍ତେଜନା ଲାଗି ରହିଛି । ଘଟଣାସ୍ଥଳରେ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଥିଲେ ମଧ୍ୟ ଏଯାବତ୍ ପରିସ୍ଥିତିରେ ସୁଧାର ଆଣିବାରେ ସଫଳ ହୋଇପାରିନାହିଁ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
