ଅନୁଗୋଳ: ମହାମାରୀ କୋରୋନା ଦାଉରୁ ରାଜ୍ୟବାସୀଙ୍କ ସୁରକ୍ଷା ପାଇଁ ଆମେରିକାରୁ ପ୍ରାର୍ଥନା କଲେ ଓଡିଆ ଦମ୍ପତ୍ତି । ଅନୁଗୋଳର ଓଡ଼ିଆ ଦମ୍ପତି ଆମେରିକାରେ କୋରୋନା ଯୋଗୁଁ 40ଦିନ ହେଲା ଘର ଭିତରେ ବନ୍ଦୀ ପରି ଜୀବନ ଅତିବାହିତ କରୁଛନ୍ତି । ଆଉ ଏଭଳି ଘଡିସନ୍ଧି ମୂହର୍ତ୍ତରେ ସାରା ବିଶ୍ବକୁ ଏବେ କୋରୋନା କାୟା ବିସ୍ତାର କରିସାରିଲାଣି । ଯାହାକୁ ଦେଖି ଆମେରିକାରେ ରହି ମଧ୍ୟ ଏହି ଓଡିଆ ଦମ୍ପତି ନିଜ ସୁରକ୍ଷା ସହ ରାଜ୍ୟବାସୀଙ୍କ ସୁରକ୍ଷା ନିମନ୍ତେ ଘରେ ରହିବାକୁ ପରାମର୍ଶ ଦେଇ ଏକ ଭିଡିଓ ପଠାଇଛନ୍ତି ।
40ଦିନ ହେଲା ଘର ଭିତରେ ବନ୍ଦୀ ପରି ଅତିବାହିତ କରୁଛନ୍ତି ଏହି ଦମ୍ପତି। ଏପଟେ ଚିନ୍ତାରେ ସେମାନଙ୍କ ପରିବାର ସଦସ୍ୟ । ବାପମା ଆଖିରୁ ଲୁହ ଶୁଖୁନି । କେବେ ପରିସ୍ଥିତି ସ୍ବାଭାବିକ ହେବ, ପୁଅ ବୋହୁ ସୁରକ୍ଷିତ ଘରକୁ ଫେରିବେ ସେହି ଆଶାରେ ଦିନ ଗଣୁଛନ୍ତି ଦମ୍ପତିଙ୍କ ପରିବାର ସଦସ୍ୟ ।
ଅନୁଗୋଳର ଓଡିଆ ଦମ୍ପତି ଶୁଭକାନ୍ତ ଓ ତାଙ୍କ ସ୍ତ୍ରୀ ସୃଜନିକା ୫ବର୍ଷ ହେଲା ଆମେରିକାର ଚିକାଗୋ ସହରରେ ରହୁଛନ୍ତି । ଶୁଭ୍ରକାନ୍ତ ସେଠାରେ ଏକ ସଂସ୍ଥାରେ ସଫ୍ଟୱେୟାର ଇଞ୍ଜିନିୟର ଭାବେ କାମ କରୁଛନ୍ତି । କୋରୋନା ମହାମାରୀକୁ ନେଇ ଆମେରିକାରେ କିଭଳି ରହିଛି ସ୍ଥିତି ସେନେଇ ନିଜ ମତ ରଖିଥିବା ବେଳେ ଓଡ଼ିଶାର ସ୍ଥିତିକୁ ନେଇ ମଧ୍ୟ ଚିନ୍ତା କରିଛନ୍ତି ଏବଂ ସମସ୍ତେ ଘରେ ରହିବାକୁ ନିବେଦନ କରିଛନ୍ତି ଏହି ଦମ୍ପତି ।
ଏହା ସହିତ ସେଠାକାର ଭିଡିଓ ମଧ୍ୟ ପଠାଇଛନ୍ତି । ସେପଟେ ଅନୁଗୋଳରେ ଥିବା ଶୁଭ୍ରକାନ୍ତଙ୍କ ଘରେ ସମସ୍ତେ ଏବେ ଚିନ୍ତାରେ । ଗଣମାଧ୍ୟମରେ ଆମେରିକା ସମ୍ପର୍କିତ ଖବର ଦେଖିଲେ ସେମାନଙ୍କ ଛାତି ଥରୁଛି । ଏ ମାସରେ ପୁଅ ବୋହୂ ଘରକୁ ଆସି ଥାଆନ୍ତେ । ଆସି ତ ପାରିଲେନି । ହେଲେ ମୃତ୍ୟୁର ଚକ୍ରବ୍ୟୁହ ଭିତରେ ସେମାନେ ଡରି ଡରି ବଞ୍ଚି ରହିଛନ୍ତି । ଏବେ ପରିବାରର ଅପେକ୍ଷା କେବେ ସ୍ଥିତିରେ ସୁଧାର ଆସିବ ଆଉ ଘରର ପୁଅ ଘରକୁ ଫେରିବ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ ଇଟିଭି ଭାରତ
