ଅନୁଗୋଳ: ଜଙ୍ଗଲରୁ ମିଳିଛି ଲକର । କେହି ଚୋରି କରି ଆଣି ଜଙ୍ଗଲରେ ଛାଡି ଥିବା ଅନୁମାନ କରୁଛି ପୋଲିସ । ଅନୁଗୋଳ ଜିଲ୍ଲା ବନ୍ତଳା ଥାନା ପିରୁଣାଗଡ଼ ମାଟିଆ ସାହି ଜଙ୍ଗଲରେ ମିଳିଛି ଏହି ଲକର । ଲକରଟି କୌଣସି ମିନି ବ୍ୟାଙ୍କ, ସମବାୟ ସମିତି କିମ୍ବା କୌଣସି ଗହଣା ଦୋକାନର ହୋଇଥାଇ ପାରେ ବୋଲି ଅମୁମାନ କରାଯାଇଛି ।
ଗ୍ରାମବାସୀଙ୍କ କହିବା ମୁତାବକ ଗତକାଲି ବିଳମ୍ବିତ ରାତ୍ରରେ ସନ୍ଦିଗ୍ଧ ଅବସ୍ଥାରେ ଏକ ଗାଡ଼ି ଜଙ୍ଗଲ ରାସ୍ତା ଦେଇ ଯିବା ଆସିବା କରୁଥିଲା । ତେଣୁ ସେହି ଗାଡିରେ ହିଁ ଦୁର୍ବୃତ୍ତମାନେ ଏହି ଲକରଟିକୁ ଏଠାକୁ ଆଣିଥିବା ଅନୁମାନ କରାଯାଉଛି । ଦୁର୍ବୃତ୍ତମାନେ ଏକ ଶାବଳ ଓ ଵଡ଼ ହାତୁଡି ସାହାଯ୍ୟରେ ଲକରଟିକୁ ଭାଙ୍ଗିବାକୁ ଚେଷ୍ଟା କରିଥିଲେ । ଭାଙ୍ଗିବାରେ ସଫଳ ନ ହେବାରୁ ଲକର ଛାଡି ଚାଲିଯାଇଛନ୍ତି । ଲକର ପାଖରୁ ହାତୁଡି ଓ ଶାବଳ ପଡିଥିବା ଦେଖିବାକୁ ମିଳିଛି ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଜଙ୍ଗଲରେ ଲକର ପଡିଥିବା ପ୍ରଥମେ ଗାଁ ଜଙ୍ଗଲ ଜଗୁଆଳି ଦେଖି ଗାଁ ଲୋକଙ୍କୁ ଖବର ଦେଇଥିଲା । ତେବେ ବର୍ତ୍ତମାନ ସୁଦ୍ଧା ଲକରଟି କାହାର, ସେ ନେଇ କିଛି ସ୍ପଷ୍ଟ ହୋଇନାହିଁ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
