ଅନୁଗୋଳ: ହଷ୍ଟେଲ ଫି'କୁ ନେଇ ତାତିଲେ କଲେଜ ଛାତ୍ରୀ । ହଷ୍ଟେଲ କର୍ତ୍ତୃପକ୍ଷଙ୍କ ଅଗ୍ରୀମ ଫି ଆଦାୟକୁ ବିରୋଧ କରି ଅନୁଗୋଳ ସରକାରୀ ମହାବିଦ୍ୟାଳୟ ସମ୍ମୁଖରେ ରାସ୍ତାରୋକ କରିଛନ୍ତି ହଷ୍ଟେଲ ଛାତ୍ରୀ । ଅନୁଗୋଳ ସରକାରୀ ମହାବିଦ୍ୟାଳୟର ଛାତ୍ରୀ ହଷ୍ଟେଲର ଅନ୍ତେବାସୀ କରିଛନ୍ତି ଆନ୍ଦୋଳନ ।
କୋରୋନା ଭଳି ସ୍ଥିତିରେ ଛାତ୍ରୀମାନେ ହଷ୍ଟେଲ କର୍ତ୍ତୃପକ୍ଷ ଅଗ୍ରୀମ ଫି କେଉଁଠୁ ଆଣି ଭରିବେ ବୋଲି ପ୍ରଶ୍ନ କରିଛନ୍ତି ଆନ୍ଦୋଳନରତ ଛାତ୍ରୀ । ମାତ୍ର ଅନୁଗୋଳ ସରକାରୀ ମହାବିଦ୍ୟାଳୟର ହଷ୍ଟେଲ ସୁପରିଟେଣ୍ଡେଣ୍ଟ ବଳପୂର୍ବକ ଫି ଆଦାୟ ପାଇଁ ତାଗିଦ କରିବା ସହ ଫି ନଦେଲେ ପରୀକ୍ଷା ଦେଇପାରିବ ନାହିଁ ବୋଲି ଧମକ ଦେଇଛନ୍ତି ।
ଖାଲି ସେତିକି ନୁହେଁ, ଅଗ୍ରୀମ ଫିସ ପୈଠ ନକଲେ ସେମାନେ ହଷ୍ଟେଲ ଛାଡି ପାରିବେ ନାହିଁ ବୋଲି ମଧ୍ୟ ସୁପରିଟେଣ୍ଡେଣ୍ଟ ବାଧ୍ୟ କରିବାରୁ ଛାତ୍ରୀମାନେ ଆନ୍ଦୋଳନକୁ ଓହ୍ଲାଇଛନ୍ତି। ଏହି ଆନ୍ଦୋଳନ ଯୋଗୁଁ ରାସ୍ତାରେ ଗାଡି ମଟର ଚଳାଚଳ ବନ୍ଦ ରହିଛି । ଘଟଣାସ୍ଥଳରେ ପୋଲିସ ଓ କଲେଜ କର୍ତ୍ତୃପକ୍ଷ ପହଞ୍ଚି ଆନ୍ଦୋଳନରତ ଛାତ୍ରୀମାନଙ୍କ ସହ ଆଲୋଚନା କରିଛନ୍ତି। ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
