ଅନୁଗୋଳ: ସାତକୋଶିଆ ଅଭୟାରଣ୍ୟରେ କ’ଣ ଅଛି ତୃଣଭୋଜି ଓ ମାଂସାଶୀ ପ୍ରାଣୀଙ୍କ ସ୍ଥିତି ତାହାକୁ ଅନୁଧ୍ୟାନ କରିବା ଆରମ୍ଭ କରିଛି ବନ୍ୟପ୍ରାଣୀ ବିଭାଗ। ଏଥିପାଇଁ ଆରମ୍ଭ ହୋଇଛି ଅଭୟାରଣ୍ୟରେ ପ୍ରାଣୀ ସର୍ବେକ୍ଷଣ କାର୍ଯ୍ୟ। ଅଭୟାରଣ୍ୟର ସମସ୍ତ ବନଖଣ୍ଡରେ ବିଟ ୱାଇଜ ଏହି ସର୍ବେକ୍ଷଣ କରାଯାଇଛି । NTCA ଗାଇଡ ଲାଇନ ଅନୁସାରେ ଏହି ସର୍ବେକ୍ଷଣ କରାଯାଉଛି । ମୌସୁମୀ ବର୍ଷା ପରେ ଅଭୟାରଣ୍ୟରେ ଉଭୟ ବନ୍ୟପ୍ରାଣୀଙ୍କ ସ୍ଥିତି କ’ଣ ଅଛି, ସେମାନଙ୍କ ଗତିବିଧି କିପରି ରହିଛି ତାହା ପରଖୁଛନ୍ତି ବିଭାଗୀୟ ଅଧିକାରୀ ଓ କର୍ମଚାରୀ। ତୃଣଭୋଜି ପ୍ରାଣୀଙ୍କ ସଂଖ୍ୟା କ’ଣ ରହିଛି, ତାହା ବଢିଛି କି ନାହିଁ ସେ ନେଇ ମଧ୍ୟ ରିପୋର୍ଟ ପ୍ରସ୍ତୁତ କରୁଛି ସାତକୋଶିଆ ଟାଇଗର ରିଜର୍ଭ।
ସାତକୋଶିଆ ବ୍ୟାଘ୍ର ପ୍ରକଳ୍ପରେ ଆସନ୍ତା ୨୧ ତାରିଖ ପର୍ଯ୍ୟନ୍ତ ଚାଲିବ ଏହି ସର୍ବେକ୍ଷଣ। ବ୍ୟାଘ୍ର ପ୍ରକଳ୍ପ ଅଞ୍ଚଳର ମୋଟ ୧୧୩୬.୭୦ ବର୍ଗକିଲୋମିଟର ପରିଧିରେ ଏହି ସର୍ବେକ୍ଷଣ କରାଯାଉଛି । ପ୍ରକଳ୍ପର ୨୨ଟି ରେଞ୍ଜରେ ଥିବା ୧୨୩ଟି ବିଟକୁ ଗୋଟିଏ ଲେଖାଏଁ ୟୁନିଟ ଭାବେ ନିଆଯାଇ ସେଥିରେ ୧୫ଟି ପବଇମ୍ପ୍ରେସନ ପ୍ୟାଡ ବା (ପିଆଇପି) ଓ ଦୁଇଟି ଟ୍ରାଞ୍ଜାକ୍ଟ ଲାଇନ ମଧ୍ୟରେ ଏହି ସର୍ବେକ୍ଷଣ କରାଯାଉଛି। ଏଥିପାଇଁ ପ୍ରତି ବିଟ ବା ୟୁନିଟରେ ଜଣେ ଫରେଷ୍ଟରଙ୍କ ସହିତ ୪ ଜଣ ୱାଚର ଏହି ସର୍ବେକ୍ଷଣ କରୁଛନ୍ତି। ଏନେଇ ଏନଟିସିଏକୁ ରିପୋର୍ଟ ଦିଆଯିବ। ପ୍ରଥମ କରି NTCA ପକ୍ଷରୁ କରାଯାଇଥିବା ସ୍ଵତନ୍ତ୍ର ମୋବାଇଲ ଆପ ଓ GPS ଏହି ସର୍ବେକ୍ଷଣରେ ବ୍ୟବହାର କରାଯାଉଛି।
ସର୍ବେକ୍ଷଣ ଏନଟିସିଏ ଗାଇଡ ଲାଇନ ଅନୁଯାୟୀ ହେଉଛି। ସମ୍ପୂର୍ଣ୍ଣ ତଥ୍ୟ ଆସିଲେ ବାଘ ଓ ତୃଣଭୋଜୀଙ୍କ ସଂଖ୍ୟା ସମ୍ପର୍କରେ ସୂଚନା ଦିଆଯିବ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
