ଅନୁଗୋଳ: ନିର୍ମାଣଧୀନ ରାଜପଥ ପାଇଁ ଚାଲୁନି କେନାଲ । ବନ୍ଦ ହୋଇଯାଇଛି କେନାଲର ପାଣି । ଖାଲି ପାଣି ନୁହେଁ ଅଟକିଯାଇଛି ଶହ ଶହ ଚାଷୀଙ୍କ ଆଶା ଓ ଅଶୁମାରୀ ସ୍ବପ୍ନ । କାରଣ କେନାଲରୁ ପାଣି ଆସିଲେ କ୍ଷେତରେ ହସିବ ସୁନାର ଫସଲ। । ହାତକୁ ଆସିବ ପାରିଶ୍ରମିକ । ହେଲେ ଜାତୀୟ ରାଜପଥ ଦୋହରି କରଣ କାମ କରୁଥିବା କଣ୍ଟ୍ରାକ୍ଟର ମନମାନୀ ଯୋଗୁଁ ପେଶି ହେଇଯାଉଛନ୍ତି ଖଲାରି ଓ ନୂଆଗାଁ ଚାଷୀ। କାହିଁକି ନା କାମର ବାହାନା ଦର୍ଶାଇ ମନଇଚ୍ଛା କେନାଲ ବନ୍ଦ କରିଦେଉଛନ୍ତି ଠିକାଦାର ।
ମଙ୍ଗୁଳିରୁ ସମ୍ବଲପୁର କୁ ସଂଯୋଗ କରୁଥିବା ୫୫ ନଂ ଜାତୀୟ ରାଜପଥର ଦୋହରି କରଣ ପାଇଁ ଉପୁଜିଛି ଏ ପ୍ରକାର ସ୍ଥିତି । 200 ଏକର ଜମିରେ ଫସଲ ଅମଳ ନେଇ ଦେଖାଦେଇଛି ଅନିଶ୍ଚିତତା । ପ୍ରଭାବିତ ହୋଇଛନ୍ତି ପାଖାପାଖୀ 500 ଚାଷୀ । ସେପଟେ ଏ ନେଇ ପ୍ରତିକ୍ରିୟା ରଖିଛନ୍ତି ଡେରେଜାଙ୍ଗ ମଧ୍ୟମ ଜଳ ସେଚନ ପ୍ରକଳ୍ପ ଉପନିର୍ବାହୀ ଯନ୍ତ୍ରୀ ।
ଏଠାରେ ପ୍ରଶ୍ନ ଉଠୁଛି ଜଳ ସେଚନ ବିଭାଗକୁ ନ ଜଣାଇ ଠିକା ସଂସ୍ଥା ନିଜ ମନମାନୀ କିପରି ଚଲାଇଛି । ଆଉ ଏ ନେଇ ରାଜପଥ ବିଭାଗ ବି କୌଣସି କାର୍ଯ୍ୟାନୁଷ୍ଠାନ ନେଇନାହିଁ । ଯଦି ବିଭାଗ ଅବରୋଧ ନ ହଟାଏ ଏହା ଉପରେ ନିର୍ଭର କରୁଥିବା ଚାଷୀ କିପରି ପୋଷିବେ ପେଟ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
