ଅନୁଗୋଳ: ପିଆଜ ପରେ ଆଳୁ । ଦରରେ ଲାଗୁନି ଲଗାମ । ପିଆଜ କିଣିବା ପୂର୍ବରୁ ଲୋକଙ୍କୁ କନ୍ଦାଉଥିଲା ଏବେ ଆଳୁ କାଟିବା ମହଙ୍ଗା ପଡିଛି । ଆଳୁ ଓ ପିଆଜ ଅତ୍ୟାବଶ୍ୟକ ପନିପରିବା ହୋଇଥିଲେ ହେଁ, ଅନୁଗୋଳରେ ଆଳୁ ଦର 30ରୁ 35 ଟଙ୍କାରେ ବିକ୍ରି ହେଉଛି। ଫଳରେ ନାହିଁ ନଥିବା ସମସ୍ୟାରେ ହନ୍ତସନ୍ତ ହେଉଛନ୍ତି ଖାଉଟି। ସେପଟେ ଯୋଗାଣ ବିଭାଗ ବି ନିରୁପାୟ ।
ପ୍ରାୟ ଦୁଇ ସପ୍ତାହ ହେଲାଣି ଅନୁଗୋଳରେ ଦର ବଢ଼ିବାରେ ଲାଗିଛି। ଏବେ ଆଳୁ କେଜି ପ୍ରତି 30 ରୁ 35 ଟଙ୍କା ଦରରେ ବିକ୍ରି ହେଉଛି । କାରଣ ଏଠାକୁ ବର୍ତ୍ତମାନ ଆଳୁ ଆମଦାନୀ ହେବାରେ କମିଛି । ଆଉ ଦର ବୃଦ୍ଧି ସାଧାରଣ ଖାଉଟି ପକେଟ ଉପରେ ମହଙ୍ଗା ସାବ୍ୟସ୍ତ ହୋଇଛି । ଆଳୁ ଭଳି ଏକ ଅତ୍ୟାବଶ୍ୟକୀୟ ପରିବାର ଦରବୃଦ୍ଧି ଏବେ ସମସ୍ତଙ୍କ ଉପରେ ସାଜୁଛି ଦାଉ । ଦର ବୃଦ୍ଧି ଯୋଗୁଁ କେବଳ ସାଧାରଣ ଖାଉଟି କାହିଁକି ଛୋଟ ବେପାରୀମାନେ ମଧ୍ୟ ଅସୁବିଧା ଭୋଗୁଛନ୍ତି ।
ଅନୁଗୋଳ ପାଇଁ ସରକାରୀ ଭାବେ ଦୈନିକ 600 କ୍ବିଣ୍ଟାଲ ଆଳୁର ଆବଶ୍ୟକତା ଥିବାବେଳେ ପ୍ରକୃତରେ ଦୈନିକ 800 କ୍ବିଣ୍ଟାଲରୁ ଅଧିକ ଆବଶ୍ୟକତା ପଡୁଛି । ଆଳୁ ପାଇଁ ପଶ୍ଚିମବଙ୍ଗ ଉପରେ ନିର୍ଭର କରିବାକୁ ପଡୁଥିବାବେଳେ ପୁରୁଣା ଆଳୁ ଶେଷ ହୋଇଛି । ଆଉ ନୂଆ ଆଳୁ ଆବଶ୍ୟକତା ଅନୁସାରେ ଅମଳ ହୋଇ ନହିଁ । ଫଳରେ ଜିଲ୍ଲାରେ ବଢିବାରେ ଲାଗିଛି ଦର । ଏନେଇ ଜିଲ୍ଲା ଯୋଗାଣ ଅଧିକାରି କହିଛନ୍ତି ବେପାରୀମାନେ ପଶ୍ଚିମବଙ୍ଗରୁ ଚଢା ଦରରେ ଆଳୁ କିଣି ଆଣୁଥିବାରୁ ଏଠାରେ ବାଧ୍ୟ ହୋଇ ଅଧିକ ଦାମରେ ବିକ୍ରି କରୁଛନ୍ତି। ଆଳୁର କାଳବଜାରୀ ନହୁଏ ସେଥିପ୍ରତି ବିଭାଗ ନଜର ରଖିଛି । କିଛି ଦିନ ହେଲା ପିଆଜ ଦର ବୃଦ୍ଧି ଲୋକଙ୍କୁ କନ୍ଦାଇ ଥିବାବେଳେ ଏବେ ଆଳୁର ମହଙ୍ଗା ମାଡ ସମସ୍ତଙ୍କ ପାଇଁ ଦାଉ ସାଧୁଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
