ଅନୁଗୋଳ: ଚୋର ଧରିବାକୁ ଯାଇ ମାଡ ଖାଇଲା ପୋଲିସ । ପିଲା ଚୋର ଅଭିଯୋଗରେ ଖାକି ପୋଷାକକୁ ନିର୍ଧୁମ ବାଡେଇଲେ ଗ୍ରାମବାସୀ । ସାଧା ପୋଷାକରେ ଆସିଥିବା ପୋଲିସ ଜାଣି ନ ପାରି ଗ୍ରାମବାସୀ ମାଡ ମାରିଥିବା ଅଭିଯୋଗ ହୋଇଛି । ଘଟଣାଟି ଅନୁଗୋଳ ଓ ଢେଙ୍କାନାଳ ଜିଲ୍ଲା ସୀମାନ୍ତ ବର୍ତ୍ତୀ ସଞ୍ଜପଡା ଗାଁରେ ଘଟିଛି ।
ଏକ ତେଲ ଚୋରକୁ ଧରିବାକୁ ଅନୁଗୋଳ ଜିଲ୍ଲାର ବଅଁରପାଳ ଥାନା ପୋଲିସ ଓ ଢେଙ୍କାନାଳ ଜିଲ୍ଲାର କଣ୍ଟାବାଣିଆ ଥାନା ପୋଲିସର ମିଳିତ ଭାବେ ସଞ୍ଜପଡାରେ ଚଢାଉ କରିଥିଲେ । ଏହି ସମୟରେ ସମସ୍ତ ପୋଲିସ ସାଧା ପୋଷାକରେ ଆସିଥିଲେ ।ଉକ୍ତ ଗ୍ରାମବାସୀ ସିଧା ପୋଷାକରେ ଥିବା ପୋଲିସକୁ ଜାଣି ପାରିନଥିଲେ । ପିଲା ଚୋର ସନ୍ଦେହ କରି ଗାଁ ଲୋକ ଏକଜୁଟ ହୋଇ ମିଳିତ ଭାବେ ପୋଲିସଙ୍କୁ ଆକ୍ରମଣ କରିଥିଲେ । ଏପରିକି ଗାଁ ଲୋକଙ୍କୁ ପୋଲିସ ସେମାନଙ୍କର ପରିଚୟ ଦେବା ପରେ ମଧ୍ୟ ଗାଁ ଲୋକ ଶୁଣି ନଥିଲେ । ପରେ ପରିସ୍ଥିତି ଅଣାୟତ ହେବାରୁ ଗାଁରେ ଅଧିକ ଦୁଇ ପ୍ଲାଟୁନ ଫୋର୍ସ ପହଞ୍ଚିଥିଲେ। ଏହା ପରେ ସମସ୍ତ ଗ୍ରାମବାସୀ ଘଟଣା ସ୍ଥଳରୁ ଛତ୍ରଭଙ୍ଗ ଦେଇଥିଲେ । ତେବେ ଗ୍ରାମବାସୀଙ୍କ ଆକ୍ରମଣରେ ଦୁଇ ଜଣ ପୋଲିସ କର୍ମଚାରୀ ଆହତ ହୋଇଛନ୍ତି ।
ଜିଲ୍ଲାର ବଅଁରପାଳ ଥାନା ବୋଉଳି ଗଡ ଠାରେ ଥିବା IOCL ର ତେଲ ପାଇପ ଲାଇନରୁ କିଛି ଦୁର୍ବୃତ୍ତ ତେଲ ଚୋରି କରିଥିବା ଅଭିଯୋଗରେ ପୋଲିସ ଚୋରକୁ ଧରିବାକୁ ଗାଁ କୁ ଯାଇଥିବାବେଳେ ଏଭଳି ଅଘଟଣ ଘଟିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
