ଅନୁଗୋଳ: ଜିଲ୍ଲା କଣିହାଁ ଅଞ୍ଚଳରେ ପ୍ରସ୍ତାବିତ କୋଇଲା ଖଣିର ସର୍ଭେ କାର୍ଯ୍ୟକୁ ବିରୋଧ । ସର୍ଭେ କାର୍ଯ୍ୟରେ ନିୟୋଜିତ କମ୍ପାନୀ କର୍ମଚାରୀଙ୍କୁ ଅଟକ ରଖିଲେ ଗାଁ ଲୋକେ । ଗ୍ରାମବାସୀଙ୍କ ଦାବି ପୂରଣ ନ କରି ସର୍ଭେ କରିବାରୁ ଗାଁ ଲୋକେ ଏହାକୁ ବିରୋଧ କରିଛନ୍ତି । ଯାହାକୁ ନେଇ ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଛି ।
ସୂଚନା ମୁତାବକ, କୋଲକାତାର ସେରିଆନ ଏକ୍ସପ୍ରେସନ ଆଣ୍ଡ ମାଇନିଂ ନାମକ ଏକ ସଂସ୍ଥା ଗତ କିଛି ଦିନ ହେବ କଣିହାଁ ବାରିହାପୁର ଗାଁକୁ ଆସି ଗ୍ରାମରେ କୋଇଲା ଅଛି କି ନାହିଁ ସର୍ଭେ କରୁଛି । ମାତ୍ର ଗ୍ରାମବାସୀ ଗାଁ କମିଟିକୁ ୧୦ ଲକ୍ଷ ଟଙ୍କା ଏବଂ ପ୍ରତି ନଳକୂଅ ପିଛା ୧୦ ହଜାର ଟଙ୍କା ଦେବାକୁ ଦାବି କରି କାମ ବନ୍ଦ କରିଥିଲେ । ଦାବି ପୂରଣ ନ କରି କମ୍ପାନୀ ମନମୁଖୀ ସର୍ଭେ କରିବାରୁ ଗାଁ ଲୋକେ କମ୍ପାନୀ କର୍ମଚାରୀଙ୍କୁ ଅଟକ ରଖିଥିଲେ ।
ଏନେଇ କମ୍ପାନୀର ଅଧିକାରୀ ଘଟଣାସ୍ଥଳକୁ ଆସି ଆଇନତଃ ଦାବି ଟଙ୍କା ଦେଇ ହେବ ନାହିଁ କହି ଗ୍ରାମବାସୀଙ୍କୁ ବୁଝାସୁଝା କରିଥିଲେ । ମାତ୍ର ଗ୍ରାମବାସୀ ସେମାନଙ୍କ ଦାବି ପୂରଣ ପାଇଁ ଜିଦ୍ କରିଥିଲେ । ତେବେ ବିଳମ୍ବିତ ରାତିରେ କଣିହାଁ ପୋଲିସ ଓ ମାଜିଷ୍ଟ୍ରେଟ ତହସିଲଦାର ଘଟଣାସ୍ଥଳକୁ ପହଞ୍ଚିଥିଲେ । କମ୍ପାନୀଗାଡ଼ିକୁ ଛାଡ଼ି ଦେବା ପାଇଁ ପ୍ରଶାସନ ପକ୍ଷରୁ କୁହାଯିବାରୁ ଗ୍ରାମବାସୀ ଗାଡ଼ି ଆଗରେ ଶୋଇ ପଡ଼ିଥିଲେ । ଯାହାକୁ ନେଇ ଉତ୍ତେଜନା ଦେଖାଦେଇଥିଲା ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
