ଅନୁଗୋଳ: ସତ ପ୍ରୋଜେକ୍ଟ ପାଇଁ ନାସା ନାଁରେ ମିଛ ଚିଠି । ଠକାମୀର ଶିକାର ହେଲେ ଛାତ୍ର ଓ ସ୍କୁଲ କର୍ତ୍ତୃପକ୍ଷ । ଏଭଳି ଘଟଣା ଘଟିଛି ଅନୁଗୋଳ ଜିଲ୍ଲାରେ । ବିଜ୍ଞାନ ପ୍ରତି ଆଗ୍ରହ ରଖି ଏକ ପ୍ରକଳ୍ପ ପ୍ରସ୍ତୁତି କରି ଚର୍ଚ୍ଚାରେ ଥିବା ଅନୁଗୋଳର ଛାତ୍ର ଶୁଭ୍ରାଂଶୁ ନାୟକଙ୍କୁ ଠକିଛି ଏହି ଠକ ସଂସ୍ଥା ।
ଶୁଭ୍ରାଂଶୁ ନିଜ ଉଦ୍ୟମରେ ଏକ ଅତ୍ୟାଧୁନିକ ‘ମାଭିକ’ ନାମକ ଏକ ଡ୍ରୋନ ପ୍ରସ୍ତୁତି କରିଥିଲେ । ଆମେରିକା ସ୍ଥିତ ନାସାରେ ଭାଗ ନେବା ପାଇଁ ସେ ହାଇଦ୍ରାବାଦରେ ରହୁଥିବା ଜଣେ ବନ୍ଧୁଙ୍କ ସହାୟତାରେ ଆବେଦନ କରିଥିଲେ । ଫଳରେ ଶୁଭ୍ରାଂଶୁ ପାଠ ପଢ଼ୁଥିବା ସ୍କୁଲ ଓ ନିଜ ପାଖକୁ ମେଲ ଯୋଗେ ନାସା ଚିହ୍ନ ଥିବା ପ୍ୟାଡ଼ରେ ଲେଖା ଥିବା ଚିଠି ଆସିଥିଲା । ନାସାରେ ସାରା ବିଶ୍ବରୁ 136ଟି ମଡେଲ ସ୍ଥାନ ପାଇଥିବାବେଳେ ଭାରତରୁ ଦୁଇଟି ସ୍ଥାନ ପାଇଛି । ସେଥି ମଧ୍ୟରୁ ଶୁଭ୍ରାଂଶୁ ଅନ୍ୟତମ ବୋଲି ଚିଠିରେ ଲେଖାଥିଲା ।
ଚିଠି ପାଇଁ କେବଳ ଶୁଭ୍ରାଂଶୁ କାହିଁକି ତାଙ୍କ ପରିବାର ସଭିଏଁ ଖୁସି ହୋଇ ଯାଇଥିଲେ । ତାଙ୍କୁ ବିଭିନ୍ନ ଆଡୁ ଅଭିନନ୍ଦନର ସୁଅ ଛୁଟି ଥିଲା । ଏପରିକି ସେ ନଭେମ୍ବର 27 ତାରିଖରେ ଆମେରିକା ଅଭିମୁଖେ ଯାତ୍ରା କରିବାକୁ ପ୍ରସ୍ତୁତ ହୋଇଥିଲେ । କିନ୍ତୁ କେନ୍ଦ୍ର ଓ ରାଜ୍ୟ ସରକାରଙ୍କ ତରଫରୁ କୌଣସି ଖବର ମିଳି ନଥିବାରୁ ସମସ୍ତଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା । ସ୍କୁଲ କର୍ତ୍ତୃପକ୍ଷ ଅନୁଗୋଳ ଏସପିଙ୍କୁ ଭେଟି ଜଣାଇଥିଲେ । ଏସ୍ପି ପ୍ରାଥମିକ ତଦନ୍ତ କରି ନାସା ପକ୍ଷରୁ ସେଭଳି କିଛି ଚିଠି ହୋଇ ନଥିବା ସ୍ପଷ୍ଟ କରିଥିଲେ ।
ଏହାପରେ ଶୁଭ୍ରାଂଶୁଙ୍କ ପରିବାର ସ୍ଥାନୀୟ ବିଧାୟକଙ୍କ ଠାରୁ ମୁଖ୍ୟମନ୍ତ୍ରୀଙ୍କ ପର୍ଯ୍ୟନ୍ତ ସମସ୍ତଙ୍କୁ ଭେଟି ଥିଲେ । ତେବେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ସେମିତି କିଛି ସୂଚନା ଆସି ନଥିବାରୁ କାର୍ଯ୍ୟାଳୟ ଭେଟିବାକୁ ଅନୁମତି ଦିଆଯାଇନଥିଲା । ପରେ ଶୁଭ୍ରାଂଶୁଙ୍କ ପରିବାର ଲୋକେ ଦିଲ୍ଲୀ ଯାଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହାୟତାରେ ବୈଦେଶିକ ମନ୍ତ୍ରଣାଳୟରେ ବୁଝାସୁଝା କରିବା ପରେ ନାସା ଲେଖାଥିବା ଚିଠି ସମ୍ପୂର୍ଣ୍ଣ ମିଛ ଏବଂ ଏହା ଫେକ୍ ବୋଲି ଜଣା ପଡିଥିଲା । ଏହା ଜଣା ପଡିବା ପରେ ସାରା ଅନୁଗୋଳରେ ନିରାଶା ସୃଷ୍ଟି ହୋଇଛି । କିଏ କାହିଁକି ଜଣେ ଛାତ୍ରଙ୍କ ଭବିଷ୍ୟତ ସହ ଖେଳିଲା ତାହା ତଦନ୍ତ କରାଯିବା ଆବଶ୍ୟକ ବୋଲି ଶୁଭ୍ରାଂଶୁଙ୍କ ପରିବାର ଲୋକେ ଦାବି କରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
