ଅନୁଗୋଳ: ବିବାହ ବନ୍ଧନରେ ବାନ୍ଧି ହେଲେ ୩୧ ଯୋଡା ବରକନ୍ୟା। ଗୋଟିଏ ସ୍ଥାନରୁ ଉଚ୍ଚାରିତ ହେଉଛି ବିବାହ ମନ୍ତ୍ର । ଚାଲିଛି ବିବାହ ଉତ୍ସବ । ବିବାହରେ ଯୋଗଦେଇଥିବା ଉଭୟ ବର ଓ କନ୍ୟା ପକ୍ଷଙ୍କ ପାଇଁ ବିବାହ ଭୋଜିର ଆୟୋଜନ କରାଯାଇଛି । ରୀତି ଓ ନୀତି ଅନୁସାରେ ମନ୍ତ୍ର ଧ୍ଵନିରେ ଅଗ୍ନିକୁ ସାକ୍ଷୀ ରଖି ବରକନ୍ୟା ବିବାହ ବନ୍ଧନରେ ନିଜକୁ ବାନ୍ଧିଛନ୍ତି । ଆଜି ଏଭଳି ଦୃଶ୍ୟ ଦେଖିବାକୁ ମିଳିଥିଲା ଅନୁଗୋଳରେ । ଅଭାବ କାରଣରୁ ନିଜ ପୁ୍ଅ ଝିଅଙ୍କୁ ବିବାହ କରାଇ ପାରୁନଥିବା ଲୋକଙ୍କ ସାହାରା ସାଜିଛି କେତେକ ସ୍ବେଚ୍ଛାସେବୀ ସଂଗଠନ । ଉତ୍କଳ ପ୍ରାଦେଶିକ ମାରୱାଡି ସମ୍ମିଳନୀର ତତ୍ତ୍ବାବଧାନରେ ଗରିବ ବାପା ମାଆଙ୍କ ପିଲାଙ୍କୁ ଆଦର୍ଶ ସାମୂହିକ ବିବାହ କରାଇଛନ୍ତି । ଖାଲି ସେତିକି ନୁହେଁ ବିବାହ ପରେ, ନବ ଦମ୍ପତ୍ତିଙ୍କୁ ଆସବାବପତ୍ର ସହ ଉପହାର ମଧ୍ୟ ଦେଇଛନ୍ତି।
ଏହି ଗଣ ବିବାହ ଉତ୍ସବରେ ଉପବାଚସ୍ପତି ରଜନୀକାନ୍ତ ସିଂ ମୁଖ୍ୟ ଅତିଥି ଭାବେ ଯୋଗ ଦେଇ ଥିଲେ। ଯେଉଁ ମାନେ ନିଜ ଗରିବୀ ଓ ଯୌତୁକ କାରଣରୁ ପୁ୍ଅ ଝିଅଙ୍କୁ ବିବାହ କରିପାରୁନଥିଲେ ସେମାନେ ଏହି ଗଣ ବିବାହରେ ବେଶ ଖୁସି ଥିବା କହିଛନ୍ତି। ଦ୍ଵିତୀୟ ଥର ପାଇଁ ଅନୁଗୋଳ ସରସ୍ଵତୀ ଶିଶୁମନ୍ଦିର ପରିସରରେ ଆୟୋଜିତ ହୋଇଥିଲା ଏହି ସାମୁହିକ ଆଦର୍ଶ ବିବାହ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥଙ୍କ ରିପୋର୍ଟ, ଇଟିଭି ଭାରତ
