ଅନୁଗୋଳ: ଜିଲ୍ଲାର ମହିମା ଧାମ । ଅଙ୍ଗାର ବନ୍ଧରେ ରହିଛି ମହିମା ଧର୍ମୀଙ୍କ ଏହି ଧାମ । ସକାଳ ହେଲେ ଏଠାରେ ପର୍ଯ୍ୟଟକଙ୍କ ଭିଡ ଜମେ । ମହିମା ଧର୍ମୀଙ୍କ କହିବା ଅନୁଯାୟୀ ୧୮୬୪ ମସିହାରେ ମହିମା ଗୋସାଇଁ କୁଆଡେ ଏଠାକୁ ଆସି ସେତେବେଳେ ଏଠାରେ ଧାମ ସ୍ଥାପନ କରିଥିଲେ । ସେବେଠାରୁ ଏଠାରେ ମହିମା ଧର୍ମାବଲମ୍ବୀଙ୍କ ଅଗାଧ ବିଶ୍ୱାସ ରହିଛି । ଏହାଛଡା ଧାମଟି ଲିଙ୍ଗରା ନାଳ କୂଳରେ ଏକ ସୁନ୍ଦର ପରିବେଶ ଭିତରେ ରହିଛି । ତେଣୁ ଏହାକୁ ଉପଭୋଗ କରିବା ସହ ମହିମା ଗୋସାଇଙ୍କ ପୁରୁଣା ଚିହ୍ନସବୁ ଦେଖିବାକୁ ପର୍ଯ୍ୟଟକ ଆସନ୍ତି । ସେହି ଦୃଷ୍ଟିରୁ ଅଞ୍ଚଳବାସୀ ଦୀର୍ଘ ଦିନ ହେଲା ଏହି ଧାମର ଉନ୍ନତିକରଣ କରିବା ସହ ଏହାକୁ ପର୍ଯ୍ୟଟନ ସ୍ଥଳର ମାନ୍ୟତା ଦେବାକୁ ଦାବି କରି ଆସୁଛନ୍ତି ।
ବର୍ଷ ତମାମ ଏଠାରେ କିଛିନା କିଛି ପର୍ବ ପାଳନ କରାଯାଉଥିବା ବେଳେ ମାଘ ମେଳା ବେଶ ଧୂମ ଧାମରେ ପାଳନ କରାଯାଏ । ତେବେ ଅଞ୍ଚଳବାସୀଙ୍କ ଅନୁରୋଧକୁ ରକ୍ଷାକରି ରାଜ୍ୟ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ଅଙ୍ଗାରବନ୍ଧ ମହିମା ଧାମ ପରିଦର୍ଶନ କରିଥିଲେ । ପରିଦର୍ଶନ କରିବା ପରେ ଏଭଳି ଏକ ବହୁ ପୁରୁଣା ମହିମା ଧାମର ଉନ୍ନତିକରଣ ହେବା ସହ ଏହାକୁ ପର୍ଯ୍ୟଟନସ୍ଥଳର ମାନ୍ୟତା ଦେବା ଉପରେ ଗୁରୁତ୍ୱ ମଧ୍ୟ ଦେଇଥିଲେ । ତେଣୁ ଚଳିତ ଆର୍ଥିକ ବର୍ଷରେ ବିଭାଗୀୟ ପାଣ୍ଠିରୁ ୫୦ଲକ୍ଷ ଟଙ୍କା ଅନୁଦାନ ଦେବାକୁ ଘୋଷଣା କରିଥିଲେ ମନ୍ତ୍ରୀ ।
ପର୍ଯ୍ୟଟନ ସ୍ଥଳୀ ମାନ୍ୟତା ପାଇଁ ଜିଲ୍ଲା ପ୍ରଶାସନର ଯାହାସବୁ ନିୟମ ରହିଛି ସେ ସବୁକୁ ଖୁବଶୀଘ୍ର ଶେଷ କରି ସରକାରଙ୍କ ପାଖକୁ ପଠାଇବାକୁ ପ୍ରଶାସନିକ ଅଧିକାରୀଙ୍କୁ ନିର୍ଦେଶ ଦେଇଛନ୍ତି । ତେବେ ଧାମଟି ପର୍ଯ୍ୟଟନସ୍ଥଳର ମାନ୍ୟତା ପାଇଲେ ଆହୁରି ଉନ୍ନତି ହୋଇ ପାରିବ। ତେଣୁ ବିଭାଗୀୟ ମନ୍ତ୍ରୀଙ୍କ ପ୍ରତିଶୃତି ତୁରନ୍ତ କାର୍ଯ୍ୟକାରୀ ହେଲେ ଧାମର ଆହୁରି ପ୍ରଚାର ପ୍ରସାର ହୋଇ ପାରିବ ବୋଲି ମହିମା ଧର୍ମାବଲ୍ବୀମାନେ ମତ ରଖିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ ଇଟିଭି ଭାରତ
