ଅନୁଗୋଳ: ଭରତପୁର କୋଇଲା ଖଣିରେ ମାଟି ଖସିବା ଘଟଣା । ଉଦ୍ଧାର ହେଲା ଜଣଙ୍କ ମୃତଦେହ । ଆହୁରି ତିନିଜଣ ଶ୍ରମିକ ଫସି ରହିଥିବା ଆଶଙ୍କା । ଉଦ୍ଧାର ଶ୍ରମିକ ଜଣକ କୁକୁଡାଙ୍ଗ ଗାଁର ପପୁନ ବିଶ୍ବାଳ । ମୃତଦେହକୁ ରଖି କୁକୁଡାଙ୍ଗ ଗ୍ରାମବାସୀ ଉପଯୁକ୍ତ କ୍ଷତିପୂରଣ ଦାବି କରିଥିବା ଜଣାପଡିଛି ।
ଗତକାଲି ରାତିରେ ଖଣିରେ ବ୍ଲାଷ୍ଟ ହୋଇ ମାଟି ଅତଡା ଧସିଯିବାରୁ 13 ଜଣ ଶ୍ରମିକ ଫସିରହିଥିଲେ । ସେମାନଙ୍କ ମଧ୍ୟରୁ 9 ଜଣ ଶ୍ରମିକଙ୍କୁ ଉଦ୍ଧାର କରାଯାଇଥିବାବେଳେ 4 ଜଣ ଶ୍ରମିକ ନିଖୋଜ ଥିଲେ। ଗତକାଲି(ମଙ୍ଗଳବାର) ରାତିରେ ମାଟି ଲୋଡିଙ୍ଗ ପାଇଁ 8ଟି ଗାଡି ଓ 15ରୁ ଅଧିକ କର୍ମଚାରୀ ଲୋଡିଙ୍ଗ କାର୍ଯ୍ୟରେ ଲାଗିଥିଲେ । ଏହି ସମୟରେ ପ୍ରାୟ 5ଶହ ମିଟର ଫୁଟ ଉପରୁ ବିରାଟ ମାଟି ଅତଡା ଖସି ପଡିଥିଲା । ଫଳରେ ମାଟି ଅତଡା ତଳେ ଥିବା 4ରୁ 5ଟି ଗାଡି ପୋତି ହୋଇଯାଇଥିବାବେଳେ ଅନେକ ଶ୍ରମିକ ଦବି ହୋଇଯାଇଥିଲେ । ତେବେ କୌଶଳକ୍ରମେ 9 ଜଣ ଶ୍ରମିକଙ୍କୁ ଉଦ୍ଧାର କରାଯାଇ ସେମାନଙ୍କୁ ତାଳଚେର ସେଣ୍ଟ୍ରାଲ ହସ୍ପିଟାଲରେ ଭର୍ତ୍ତି କରାଯାଇଛି ।
ସେପଟେ, ଏବେ ବି ମାଟି ଅତଡା ଖସୁଥିବାରୁ ଖଣି ଚାରି ପାଖରେ ବଡ଼ ବଡ଼ ଫାଟ ସୃଷ୍ଟି ହୋଇଛି । ଫଳରେ ପୁଣି ଥରେ ଅଘଟଣ ଆଶଙ୍କା କରାଯାଇ ପୋଲିସ ସ୍ଥାନୀୟ ଲୋକଙ୍କୁ ଖଣି ନିକଟକୁ ଛଡାଯାଉନାହିଁ ।
ଆଜି ସକାଳୁ ଉଦ୍ଧାର କାର୍ଯ୍ୟକୁ ଚାଲୁ ରଖା ଯାଇଛି । ଘଟଣାସ୍ଥଳରେ ଅନୁଗୋଳ ଜିଲ୍ଲାପାଳ, ଏସପି, ଡ଼ିଆଇଜି ଓ ଏମ୍ସିଏଲର ବରିଷ୍ଠ ଅଧିକାରୀମାନେ ପହଞ୍ଚିଛନ୍ତି । ତାଳଚେର ବିଧାୟକ ବ୍ରଜ କିଶୋର ପ୍ରଧାନ ଘଟଣାସ୍ଥଳରେ ରହି ତଦାରଖ କରୁଛନ୍ତି । ଏମ୍ସିଏଲର ରେସ୍କୁ ଟିମ ଦିନ ତମାମ ଲାଗି ପଡିଥିବା ବେଳେ ସନ୍ଧ୍ୟାରେ ମଧ୍ୟ ବ୍ୟାପକ ଆଲୋକ ବ୍ୟବସ୍ଥା କରାଯାଇ ଉଦ୍ଧାର କାର୍ଯ୍ୟ ଚାଲୁ ରଖିବାକୁ ନିଷ୍ପତ୍ତି ନିଆଯାଇଛି। ଆଜି ଜଣେ ଶ୍ରମିକ ଉଦ୍ଧାର ହୋଇଥିବାବେଳେ ଏବେ ବି 3 ଜଣ ଶ୍ରମିକ ନିଖୋଜ ।
ଅନ୍ୟ ପକ୍ଷରେ ଏହି ଘଟଣାକୁ ତାଳଚେର ସୁରକ୍ଷା ମଞ୍ଚ ଓ ବିଜେପି ପକ୍ଷରୁ ତୀବ୍ର ନିନ୍ଦା କରାଯାଇଛି । ଏମସିଏଲର ସୁରକ୍ଷା ବ୍ୟବସ୍ଥା ଢିଲା ଯୋଗୁଁ ଏଭଳି ଘଟଣା ଘଟୁଛି । ନିରୀହ ଶ୍ରମିକମାନେ ମୃତ୍ୟୁବରଣ କରୁଛନ୍ତି । ତେଣୁ ଏହାର ଉଚ୍ଚସ୍ତରୀୟ ତଦନ୍ତ କରିବାକୁ ଦାବି ଜଣାଇଛନ୍ତି । ଏଥିସହ ମୃତକ ପରିବାରକୁ ପର୍ଯ୍ୟାପ୍ତ କ୍ଷତିପୂରଣ ପ୍ରଦାନ ଦାବି କରିଛନ୍ତି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
