ଅନୁଗୋଳ: ସରକାରୀ ଜମି ପାଇଁ ସଂଘର୍ଷ । ବାଡ଼ ଦେବା ବେଳେ ଦୁଇ ପରିବାର ମଧ୍ୟରେ ରକ୍ତାକ୍ତ ସଂଘର୍ଷ । ଯାହା ଫଳରେ 7 ଜଣ ଆହତ ହୋଇଛନ୍ତି । ଅନୁଗୋଳ ଜିଲ୍ଲା କଣିହାଁ ବ୍ଲକ ବିରୁ ଗାଁରେ ଗୋଷ୍ଠୀ ସଙ୍ଘର୍ଷ ଦେଖିବାକୁ ମିଳିଛି । ସରକାରୀ ଜମିରେ ବାଡ଼ ଦେବାକୁ କେନ୍ଦ୍ର କରି ଦୁଇ ପରିବାର ମଧ୍ୟରେ ହଣାକଟା ହୋଇଥିବା ଜଣାପଡ଼ିଛି ।
ଏଥିରେ ଉଭୟ ପରିବାରର ୭ ଜଣ ଆହତ ହୋଇଛନ୍ତି । ଆହତ ମାନଙ୍କୁ ତାଳଚେର ଡାକ୍ତରଖାନାରେ ଭର୍ତ୍ତି କରାଯାଇଛି । ଏକ ସରକାରୀ ଜାଗାରେ ବାଡ଼ ଦେବାକୁ କେନ୍ଦ୍ର କରି ସାହୁ ପରିବାର ଆଉ ନାଏକ ପରିବାର ମଧ୍ୟରେ ଏହି ସଂଘର୍ଷ ହୋଇଥିବା ଜଣାପଡିଛି । ସେହି ଜାଗାରେ ସାହୁ ପରିବାର ବାଡ଼ ଦେଉଥିବା ବେଳେ ନାଏକ ପରିବାର ପ୍ରତିବାଦ କରିଥିଲେ ।
ଉଭୟ ପରିବାର ମଧ୍ୟରେ ଯୁକ୍ତିତର୍କ ବେଳେ ସାହୁ ପରିବାର ଟାଙ୍ଗିଆ ଓ କଟୁରୀରେ ନାଏକ ପରିବାରକୁ ମରଣାନ୍ତକ ଆକ୍ରମଣ କରିଥିଲେ। ଫଳରେ ବ୍ରହ୍ମାନନ୍ଦ ନାଏକଙ୍କ ପରିବାରରୁ ୪ ଜଣ ଏବଂ ତ୍ରିଲୋଚନ ସାହୁଙ୍କ ପରିବାରର ୨ ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ବ୍ରହ୍ମାନନ୍ଦ ନାଏକଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଏହି ଘଟଣାରେ ସମଲ ପୋଲିସ ଏବଂ ତାଳଚେର ପୋଲିସ ତଦନ୍ତ ଆରମ୍ଭ କରିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
