ଅନୁଗୋଳ: ଗୋଚର ଜମି ଜବରଦଖଲକୁ ନେଇ ଗାଁରେ ବିବାଦ । ଗୁରୁବାର ଅନୁଗୋଳ ଜିଲ୍ଲା ପୁରୁଣାକୋଟ ଥାନା ସରଧାପୁର ଗାଁରେ ଗୋଚର ଜମିରେ ଘର କରି ରହୁଥିବା ଲୋକର ଘରଭଙ୍ଗାକୁ ନେଇ ପୋଲିସ ଏବଂ ଗାଁ ଲୋକଙ୍କ ମଧ୍ୟରେ ଉତ୍ତେଜନା ।
ମିଳିଥିବା ସୂଚନା ଅନୁସାରେ, ସରଧାପୁର ଗାଁର ଏକ ଗୋଚର ଜମିରେ ମାଙ୍ଗତା ନାୟକ ନାମକ ଜଣେ ବ୍ୟକ୍ତି ଅନେକ ବର୍ଷ ହେବ ଘର କରି ରହିଆସୁଥିଲା । ଗାଁରେ ଏକ ପାନୀୟ ଜଳ ପ୍ରକଳ୍ପ ନିର୍ମାଣ ପାଇଁ ଯାଗା ଆବଶ୍ୟକ ପଡିବାରୁ ମାଙ୍ଗତା ରହୁଥିବା ଗୋଚର ଜମିରେ ପ୍ରକଳ୍ପ କରିବାକୁ ଗାଁ ଲୋକେ ଜିଦ ଧରିଥିଲେ ।
ଖାଲି ସେତିକି ନୁହେଁ ମାଙ୍ଗତା ରହୁଥିବା ଘରକୁ ମଧ୍ୟ ଗାଁ ଲୋକେ ମିଶି ଭାଙ୍ଗି ଦେଇଥିବା ମାଙ୍ଗତା ପୋଲିସକୁ ଅଭିଯୋଗ କରିଥିଲା । ଅଭିଯୋଗ ପାଇ ପୋଲିସ ଗାଁରେ ପହଞ୍ଚି ଘର ଭାଙ୍ଗିଥିବା ଲୋକଙ୍କୁ ଗିରଫ କରୁଥିବାବେଳେ ପୋଲିସ ଗାଡିକୁ ଅଟକ ରଖିଥିଲେ କିଛି ମହିଳା । ଯାହାକୁ ନେଇ ଗୁରୁବାର ଗାଁରେ ପୋଲିସ ଏବଂ ଗାଁ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି ।
ଏପଟେ ଘଟଣାସ୍ଥଳରେ ଅନ୍ୟ ଥାନା ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରି ଅଟକ ଗାଡିକୁ ଉଦ୍ଧାର କରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
