ଅନୁଗୋଳ: ମହାମାରୀ କୋରୋନା ଯୋଗୁଁ ଗତ ବର୍ଷ ପରି ଏଥର ବି ଫିକା ପଡିଛି ତାଳଚେରର ପ୍ରସିଦ୍ଧ ଗଣପର୍ବ ଗଣେଶ ପୂଜା । କଟକଣା ମଧ୍ୟରେ କେବଳ ଘରେ ଏବଂ ବିଭିନ୍ନ ପୂଜା କମିଟି ମଣ୍ଡପ ଭିତରେ ବିଧି ମୁତାବକ ପୂଜାର୍ଚ୍ଚନା କରାଯାଇଛି ।
କୋରୋନା କଟକଣା ଯୋଗୁଁ ଏଥର ତାଳଚେରରେ ପ୍ରସିଦ୍ଧ ଗଣେଶ ପୂଜା ବନ୍ଦ ହୋଇଯାଇଛି । କେବଳ ଘରେ ଏବଂ ବିଭିନ୍ନ ପୂଜା କମିଟି ମଣ୍ଡପ ଭିତରେ ବିଧି ମୁତାବକ ପୂଜାର୍ଚ୍ଚନା କରାଯାଇଛି । ଗଣେଶ ପୂଜା ତାଳଚେରବାସୀଙ୍କର ଗଣପର୍ବ ଭାବେ ଜଣାଶୁଣା । ଗଣେଶ ପୂଜା ଆସିଲେ ପ୍ରତ୍ୟେକଙ୍କ ଘରକୁ ବନ୍ଧୁ ବାନ୍ଧବ ଆସନ୍ତି । ସମସ୍ତେ ନୂତନ ବସ୍ତ୍ର ପରିଧାନ କରନ୍ତି । ଘରେ ଘରେ ପିଠା ପଣାର ଆସର ଜମେ । କିନ୍ତୁ ଗତ ୨ ବର୍ଷ ହେବ ଏ ସବୁ ବନ୍ଦ ହୋଇଯାଇଥିବାରୁ ତାଳଚେରବାସୀଙ୍କ ମନରେ ଦୁଃଖ ଦେଖିବାକୁ ମିଳିଛି ।
ଏହାସହିତ ମୂର୍ତ୍ତି କାରିଗରମାନେ ବର୍ଷ ସାରାର ରୋଜଗାର ହରାଇଛନ୍ତି । ଛୋଟ ମୋଟ ଦୋକାନୀମାନେ ନିରାଶ ହୋଇଛନ୍ତି । ତୋରଣ, ଲାଇଟ ଓ ଅନ୍ୟାନ୍ୟ ସାମଗ୍ରୀ ପାଇଁ ଭଲ ଦି ପଇସା ପାଉଥିବା ଟେଣ୍ଟ ହାଉସ ମାଲିକମାନେ ହାତ ବାନ୍ଧି ବସିଛନ୍ତି । ତାଳଚେରରେ ଗଣେଶପୂଜା ପ୍ରାୟ ୧୨ ଦିନ ଧରି ଚାଲେ । ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ । ଚାରିଆଡ ମନ୍ତ୍ର ଧ୍ବନିରେ ପ୍ରକମ୍ପିତ ହୋଇ ଉଠେ । ଶତାଧିକ ମଣ୍ଡପରେ ଗଜାନନ ପୂଜା କରାଯାଏ । ହେଲେ କୋରୋନା ଯୋଗୁଁ ସବୁ ଫିକା ପଡିଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
