ଅନୁଗୋଳ: ନିଆଁ ଲାଗି ଜଳିଗଲା ଲୁଗା ଦୋକାନ । ଅନୁଗୋଳ ସହରର ଶଙ୍କର ସିନେମା ରୋଡ଼ରେ ଥିବା ଏକ ଲୁଗା ଦୋକାନରେ ଅଗ୍ନିକାଣ୍ଡ ଘଟି ସମ୍ପୂର୍ଣ୍ଣ ଜଳି ଯାଇଛି । ଦୋକାନ ନିକଟରେ ଥିବା ଦୁଇରୁ ଅଧିକ ଘର ମଧ୍ୟ ପୋଡି ପାଉଁଶ ହୋଇଯାଇଛି । ଘଟଣାସ୍ଥଳରେ ଅନୁଗୋଳ ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିବା ପୂର୍ବରୁ ସବୁକିଛି ପୋଡି ପାଉଁଶ ହୋଇ ଯାଇଛି । ସର୍ଟସର୍କିଟ ଯୋଗୁଁ ଅଗ୍ନିକାଣ୍ଡ ଘଟିଥିବା କୁହାଯାଉଛି ।
ସନ୍ଧ୍ୟା ପ୍ରାୟ ୫ଟା ସମୟରେ ଅନୁଗୋଳ ସହରରେ ଥିବା ବଜାରରେ ଏହି ଅଘଟଣ ଘଟିଛି । ହଠାତ ସର୍ଟସର୍କିଟ ଯୋଗୁଁ ନିଆଁ ଲାଗିବା ଆରମ୍ଭ ହୋଇଥିଲା । ଦେଖୁ ଦେଖୁ ନିଆଁ ଚାରିଆଡେ ବ୍ୟାପି ଯାଇଥିଲା । ଦୋକାନ ଭିତରେ ବହୁ ପରିମାଣର ଲୁଗା ମହଜୁଦ ଥିଲା । ସିଲକ, କଟନ ଆଦି ଅନେକ କିସମର ଲୁଗା ଥିବାରୁ ସହଜରେ ଦୋକାନରେ ନିଆଁ ଲାଗିଯାଇଥିଲା । ସୌଭାଗ୍ୟ ବସତଃ ଦୋକାରେ ଥିବା କର୍ମଚାରୀମାନେ ସେଠାରୁ ବାହାରୁ ଯିବାରେ ସଫଳ ହୋଇଥିଲେ । ଏପରିକି ସେଠାରେ ଥିବା ବାଇକ ମଧ୍ୟ ପୋଡି ଯାଇଛି । ଦୋକାନକୁ ଲାଗି ଅନ୍ୟାନ୍ୟ ଦୋକାନ ଥିବାରୁ ସମସ୍ତେ ଭୟଭୀତ ହୋଇ ପଡ଼ିଥିଲେ । ତେବେ ଅଗ୍ନିକାଣ୍ଡରେ କେହି ଆହତ ହୋଇ ନଥିବା ଜଣାପଡ଼ିଛି ।
ଏହା ମଧ୍ୟ ପଢ଼ନ୍ତୁ: ପାରାଦ୍ବୀପରେ ନେହେରୁ ଓ ବିଜୁଙ୍କୁ ଅସମ୍ମାନ: ପ୍ରତିମୂର୍ତ୍ତି ଭାଙ୍ଗିଲେ, ଅଳିଆ ଗଦାକୁ ଫିଙ୍ଗିଲେ
ଖବର ପାଇ ଅନୁଗୋଳ ଓ ଜିନ୍ଦଲରୁ ୩ଟି ଦମକଳ ବାହିନୀ ଘଟଣାସ୍ଥଳରେ ଆସି ପହଞ୍ଚିଥିଲେ । ତୁରନ୍ତ ବିଦ୍ୟୁତ ସଂଯୋଗ ବିଛିନ୍ନ କରାଯାଇ ନିଆଁଲିଭା କାର୍ଯ୍ୟ ଆରମ୍ଭ କରାଯାଇଥିଲା । କିନ୍ତୁ ସେତେବେଳକୁ ସବୁ କିଛି ପୋଡି ପାଉଁଶ ହୋଇ ଯାଇଥିଲା । ଦୀର୍ଘ ସମୟ ପରେ ନିଆଁକୁ ଆୟତ୍ତ କରିବାରେ ଦମକଳ ବାହିନୀ ସଫଳ ହୋଇଥିଲା । ଅଗ୍ନିକାଣ୍ଡ ନେଇ ସମଗ୍ର ଅଞ୍ଚଳରେ ଭୟର ବାତାବରଣ ଖେଳିଯାଇଥିଲା ।
ସୂଚନା ଅନୁଯାୟୀ, ସହରର ଅଧିକାଂଶ ଦୋକାନରେ ଫାୟାର ସେଫଟି ପାଇଁ କୌଣସି ବ୍ୟବସ୍ଥା ନାହିଁ । ସବୁ ସମୟରେ ଏହି ବଜାରରେ ଗହଳି ରହିଥାଏ । ନିତିଦିନ ହଜାର ହଜାର ଲୋକଙ୍କ ଯାତାୟାତ ହୋଇଥାଏ । ଅଗ୍ନିକାଣ୍ଡ ଯୋଗୁଁ ବଡ଼ ଅଘଟଣ ଘଟିବାର ସମ୍ଭାବନା ଥିଲା । ଘଟଣାରେ କୌଣସି ଜୀବନ ହାନି ହୋଇନଥିବା ବେଳେ ଏକ ବଡ ଧରଣର ବିପଦ ମୁହଁରୁ ଉକ୍ତ ଅଞ୍ଚଳବାସୀଙ୍କୁ ଉଦ୍ଧାର କରିବାରେ ଅଗ୍ନିଶମ ବିଭାଗ ସଫଳ ହୋଇଥିଲା ।
ଇଟିଭି ଭାରତ, ଅନୁଗୋଳ
