ଅନୁଗୋଳ: ରାଜ୍ୟରେ ଗୋଟିଏ ପରେ ଗୋଟିଏ ଲଘୁଚାପଜନିତ ଲଗାଣ ବର୍ଷା ପରିବା ଚାଷୀଙ୍କ ପାଇଁ କାଳ ସାଜିଛି । ଲଗାତାର ଦୁଇ ଦୁଇଟି ଲଘୁଚାପ ପରେ ଅନୁଗୋଳ ଜିଲ୍ଲା ପରିବା ଚାଷୀଙ୍କର ବ୍ୟାପକ କ୍ଷୟକ୍ଷତି ଘଟିଛି ।
ଚାଷଜମିରେ ଲଘୁଚାପର ମାଡ
ବର୍ଷା ଲାଗି ରହିବାରୁ ଚାଷ ଜମିରେ ପାଣି ଜମି ରହିଛି । ଫଳରେ ଏକର ଏକର ଜମିରେ ହୋଇଥିବା ବାଇଗଣ ଚାଷ ପଚି ନଷ୍ଟ ହୋଇଯାଇଛି । ଫଳ ତ ନଷ୍ଟ ହେଉଛି ତା ସହ ଗଛ ମୂଳ ମଧ୍ୟ ପାଣିରେ ରହି ପଚିଯାଇଛି । ଚାଷ ଜମିରେ ଏଭଳି ଦୃଶ୍ୟ ଦେଖି ଚିନ୍ତାରେ ଜିଲ୍ଲାର ଅଧିକାଂଶ ଚାଷୀ ।
ସମଗ୍ର ଜିଲ୍ଲାର ଚାଷୀଙ୍କର ଏହି ଅବସ୍ଥା ଥିବାବେଳେ ଅନୁଗୋଳ ବ୍ଲକ ତଳଗଡ, ଗଡ ତରାସ, କରତପଟା ଆଦି ପଞ୍ଚାୟତ ଅଞ୍ଚଳରେ ଅଧିକ କ୍ଷତି ହୋଇଥିବା ଦେଖିବାକୁ ମିଳିଛି । ଏସବୁ ଅଞ୍ଚଳରେ ଗଛରେ ଭଲ ଫଳ ଆସୁ ନ ଥିବାବେଳେ ଯାହା ବି ଫଳ ଆସୁଛି ପୋକଲାଗି ନଷ୍ଟ ହୋଇଯାଉଛି । ତେବେ ଧାର କରଜ କରି ଚାଷ କରିଥିବା ଚାଷୀ ଭଲ ଅମଳ ପାଇଁ ଆଶା ରଖିଥିଲା, ମାତ୍ର ବର୍ଷା ସେ ସବୁକୁ ଧୋଇଦେଇଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
