ଅନୁଗୋଳ: ତାଳଚେର MCL ର ଭରତପୁର କୋଇଲା ଖଣି ବନ୍ଦ ନେଇ ତେଜିଛି ବିବାଦ । କିଏ ଖଣି ଚଲାଇବ ? ତାକୁ ନେଇ ସୋଲଡା ଓ ଡଅଁରା ଗାଁ ଭିତରେ ଟଣାଓଟରା । 2ପକ୍ଷରୁ ଚାଲିଛି ଆରୋପ ଓ ପ୍ରତ୍ୟାରୋପ । ଏହି ତୁ ତୁ ମେ ମେ ଭିତରେ ଖଣି କାର୍ଯ୍ୟକାରୀ କରିବାକୁ ଲୋଡାଯାଇଛି ପ୍ରଶାସନର ହସ୍ତକ୍ଷେପ ।
ପ୍ରକାଶ ଯେ, ଗତ ୧୨ ତାରିଖ ଠାରୁ ବନ୍ଦ ରହିଛି MCL ର ଭରତପୁର କୋଇଲା ଖଣି । ଏନେଇ ସୋଲଡା ଗ୍ରାମବାସୀ ଏକ ସାମ୍ବାଦିକ ସମ୍ମିଳନୀ କରି ଅଭିଯୋଗ କରିଛନ୍ତି ଯେ, କେତେକ ରାଜନୈତିକ ବ୍ୟକ୍ତିଙ୍କୁ ହାତକରି ଡଅଁରା ଗାଁର କିଛି ଯୁବକ ଏକଚାଟିଆ ଭାବେ ଖଣିକୁ ବନ୍ଦ କରି ରଖିଛନ୍ତି । ଯେଉଁଠାରେ ଖଣି ଖୋଳା ଯାଉଛି ସେମାନେ ସେଠାରେ ନିଜର ଟ୍ରକ ଲଗାଇ ଲୋଡିଙ୍ଗ କରୁଛନ୍ତି । ଏ ବାବଦରେ ପ୍ରତିବାଦ କଲେ ଖଣି ବନ୍ଦ କରି ଅନ୍ୟମାନଙ୍କୁ ହଇରାଣ କରୁଛନ୍ତି ।
ଏଭଳି ବିଭିନ୍ନ ସମସ୍ୟା ଯୋଗୁଁ ଖଣି ଉପରେ ନିର୍ଭର କରୁଥିବା ଶ୍ରମିକ , ଡ୍ରାଇଭର ନିଜର ଜୀବିକା ହରାଉଛନ୍ତି । ଏଣୁ ଖଣି ସମ୍ପୂର୍ଣ୍ଣ କାର୍ଯ୍ୟକ୍ଷମ କରାଇବା ପାଇଁ ସୋଲଡ଼ା ଗାଁ ସମେତ ସତ୍ୟବାଦୀପୁର, ନାଥଗାଁ, ତେଲିପୁର ଓ ଖୁରିଙ୍ଗାର ଗ୍ରାମବାସୀ ଦାବି କରିଛନ୍ତି । ସେମାନଙ୍କ ଅଭିଯୋଗ ମୁତାବକ ଖଣି ବନ୍ଦ ଯୋଗୁଁ MCL କୋଟି କୋଟି ତାଙ୍କ କ୍ଷତି ସହୁଥିବା ବେଳେ ସରକାର ମଧ୍ୟ ରାଜସ୍ବ ହରାଉଛନ୍ତି ।
ଯଦି ଏନେଇ ତୁରନ୍ତ ଦାବି ପୂରଣ ନ ହୁଏ ତେବେ ୨୬ ତାରିଖରେ ଅନୁଗୋଳ ଜିଲ୍ଲାପାଳଙ୍କ ଅଫିସରେ ଧାରଣା ଦେବେ । ଏହା ପରେ ବି କେହି ନ ଶୁଣିଲେ ପୁଣି ୨୮ରେ ବୁର୍ଲ୍ଲା MCL ମୁଖ୍ୟ କାର୍ଯ୍ୟାଳୟ ଓ ପରେ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ କରିବେ ବୋଲି ଅଭିଯୋଗକାରୀ ଧମକ ଦେଇଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ରଥ, ଇଟିଭି ଭାରତ
