ଅନୁଗୋଳ: ରାଜ୍ୟରେ କୋରୋନାର ସ୍ଥିତିକୁ ନଜରରେ ରଖି ରାଜ୍ୟ ସରକାର ସବୁ ଜିଲ୍ଲାରେ କୋଭିଡ-19 ହସ୍ପିଟାଲ କାର୍ଯ୍ୟକ୍ଷମ କରାଉଛନ୍ତି । ଏହି କ୍ରମରେ ସୋମବାର ଅନୁଗୋଳ ଜିଲ୍ଲା ତାଳଚେର ନେହେରୁ ଶତାବ୍ଦୀ ହସ୍ପିଟାଲକୁ କୋଭିଡ 19 ହସ୍ପିଟାଲରେ ପରିଣତ କରାଯାଇଛି ।
ଜିଲ୍ଲା ପ୍ରଶାସନ ଓ ଏମସିଏଲର ମିଳିତ ସହଯୋଗରେ ସମ ହସ୍ପିଟାଲ ସହ MOU ସ୍ବାକ୍ଷର ହେବା ପରେ ମୁଖ୍ୟମନ୍ତ୍ରୀ ଭିଡ଼ିଓ କନଫରେନ୍ସି ମାଧ୍ୟମରେ ଏହି ହସ୍ପିଟାଲକୁ ଉଦଘାଟନ କରିଛନ୍ତି । କୋରୋନା ମୁକାବିଲା ପାଇଁ ହସ୍ପିଟାଲରେ 150ଟି ଶଯ୍ୟା ପ୍ରସ୍ତୁତ କରାଯିବା ସହ 6ଟି ଆଇସିୟୁର ବ୍ୟବସ୍ଥା ମଧ୍ୟ ରହିଛି । ଜିଲ୍ଲା ଖଣିଜ ପାଣ୍ଠି ଏବଂ ଏମସିଏଲ ପାଣ୍ଠିରୁ ଏହି ହସ୍ପିଟାଲ ନିର୍ମାଣ କରାଯାଇଥିବା ବେଳେ ଜିଲ୍ଲା ସ୍ୱାସ୍ଥ୍ୟ ବିଭାଗର ଡାକ୍ତର ଏଠାରେ ଚିକିତ୍ସା ପାଇଁ ସାମିଲ ହେବେ ।
ଜିଲ୍ଲାରେ କୋଭିଡ ହସ୍ପିଟାଲର ଉଦଘାଟନ କାର୍ଯ୍ୟକ୍ରମରେ ଜିଲ୍ଲାପାଳ ମନୋଜ କୁମାର ମହାନ୍ତି ସମ୍ ହସ୍ପିଟାଲରେ ମୁଖ୍ୟ ଡାକ୍ତର ଅଶୋକ ମହାପାତ୍ର ଓ ଏମସିଏଲର ଅଧିକାରୀ ମାନେ ଉପସ୍ଥିତ ରହିଥିଲେ । ତେବେ ଏହି ହସ୍ପିଟାଲ ଆଖପାଖ ଜିଲ୍ଲାର କୋଭିଡ ଆକ୍ରାନ୍ତଙ୍କୁ ଚିକିତ୍ସା ସୁବିଧା ଯୋଗାଇବ । ସମ ହସ୍ପିଟାଲର ଡାକ୍ତର ମାନଙ୍କ ସହ ଜିଲ୍ଲାର ସ୍ୱାସ୍ଥ୍ୟକର୍ମୀ ଓ ଡ଼ାକ୍ତର ମାନେ ମଧ୍ୟ ଏଠାରେ ଚିକିତ୍ସା ସେବା ଯୋଗାଇବେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
