ଅନୁଗୋଳ: ସମସ୍ତଙ୍କର ହେବ ପକ୍କା ଘର । ଆଉ ଏଥିପାଇଁ କେନ୍ଦ୍ର ସରକାର ଗରିବ ଲୋକଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଅର୍ଥ ଦେଉଛନ୍ତି । ଘର ପାଇଁ ଆବଶ୍ୟକୀୟ ଅର୍ଥ ତିନୋଟି କିସ୍ତିରେ ହିତାଧିକାରୀଙ୍କ ବ୍ୟାଙ୍କ ଖାତାକୁ ଆସୁଛି । ହେଲେ ଅନୁଗୋଳ ବ୍ଲକ ମାଟିଆସାହି ପଞ୍ଚାୟତର ବରଡ଼ସାହି ଗାଁରେ ଏହି ଅର୍ଥ ଠିକାଦାରଙ୍କ ଦ୍ବାରା ହରିଲୁଟ ହୋଇଥିବାର ଅଭିଯୋଗ ହୋଇଛି ।
ପୁରା ଗାଁରେ ପ୍ରାୟ ୩୦ଟି ପରିବାରକୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ମିଳିଛି । ଅନୁଦାନ ଲକ୍ଷେ କୋଡ଼ିଏ ହଜାର ଟଙ୍କା । ତେବେ ଘର ତିଆରିରେ ଅସମର୍ଥତା ପ୍ରକାଶ କରି ଠିକାଦାର ହାତରେ ବ୍ୟାଙ୍କ ଖାତାକୁ ଟେକିଦେଇଛନ୍ତି ଏମାନେ । ବର୍ତ୍ତମାନର ଚିତ୍ର କିଛି ଏହିଭଳି । ଇଟାରେ ତିଆରି ହୋଇଛି କାନ୍ଥ । ଛାତ ପଡ଼ିବ ବୋଲି ବନ୍ଧା ହୋଇଛି ବାଉଁସ ଭାବା । ବାହାରେ ପଡ଼ି ପଡ଼ି ଖତରା ହେଲାଣି ଲୁହା ଛଡ଼ । ହେଲେ ଘର ତିଆରି ଲାଗି ଦାୟିତ୍ବ ନେଇଥିବା ଠିକାଦାର ଟଙ୍କା ଧରି ଫେରାର ।
ଯୋଜନାରେ ଟଙ୍କା ପାଇବା ପାଇଁ ସେମାନେ ବ୍ୟାଙ୍କ ଖାତା ଖୋଲିଛନ୍ତି । ତେବେ ଖାତାକୁ ଟଙ୍କା ଆସିବା ପରେ ଲୋକଙ୍କୁ ଭଣ୍ଡେଇ ଟଙ୍କା ଉଠାଇ ନେଇଛି ସମ୍ପୃକ୍ତ ଠିକାଦାର । ପ୍ରତିଥର ଲୋକଙ୍କଠୁ ଟିପ ଚିହ୍ନ ନେଇ ଟଙ୍କା ଉଠାଏ ଠିକାଦାର । ଏବେ ଖାତା ପଡ଼ିଛି ଖାଲି ଆଉ ଠିକାଦାର ପାଖକୁ ଦୌଡ଼ିଦୌଡ଼ି ଧରାଛୁଆଁ ମିଳୁନି । ଅଧା ଘରକୁ ସଂପୂର୍ଣ୍ଣ କରିବାକୁ ଲୋକେ ଆପତ୍ତି କରିବାରୁ ତାଙ୍କୁ ପୁଣି ଠିକାଦାର ଟଙ୍କା ମାଗୁଥିବା ଅଭିଯୋଗ କରିଛନ୍ତି । ଏଭଳି ସ୍ଥିତିରେ କେବେ ଯେ ମୁଣ୍ଡ ଗୁଞ୍ଜିବାକୁ ପକ୍କା ଘର ଖଣ୍ଡେ ଜୁଟିବ ଏ କଥା ଭାବି ଚିନ୍ତାରେ ଏହି ନିରୀହ ହିତାଧିକାରୀ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
