ଅନୁଗୋଳ: ଚାଷ କ୍ଷେତରେ ଉଜୁଡୁଛି ଯାଇଛି ଚାଷୀ ଫସଲ । ଅମଳ ପୂର୍ବରୁ ସବୁ କିଛି ଜମିରେ ପଚି ସଢି ଯାଇଛି । ମଉଳିଯାଇଛି ଯାଇଛି ଚାଷୀର ସ୍ବପ୍ନ । ଏବେ ଉଜୁଡା କ୍ଷେତକୁ ଦେଖି ଚିନ୍ତାରେ ଚାଷୀ । ଏ ଦୃଶ୍ୟ ହେଉଛି ଅନୁଗୋଳ ଜିଲ୍ଲାର । ଜିଲ୍ଲାର ବଅଁରପାଳ ବ୍ଲକ ତୁବେ ପଞ୍ଚାୟତ କୁଲେଇ ଗାଁରେ ନଷ୍ଟ ହୋଇଯାଇଛି ଚାଷୀଙ୍କ ଏକର ଏକର କୋବି ଫସଲ । ଗତ କିଛି ଦିନ ଧରି ହୋଇଥିବା ଲଘୁଚାପ ଜନିତ ଲଗାଣ ବର୍ଷାରେ ସବୁ ନଷ୍ଟ ହୋଇଯାଇଛି । ଜଣେ ଜଣେ ଚାଷୀ ୫ ହଜାରରୁ ୧୦ ହଜାର ପର୍ଯ୍ୟନ୍ତ ଚାରା ଲଗାଇ ଥିଲେ। ବର୍ଷା ଯୋଗୁଁ ଚାରା ସବୁ ପଚିଯାଇଛି । ତେଣୁ ଚାଷୀମାନେ ଏବେ ମୁଣ୍ଡରେ ହାତ ଦେଇ ବସିଛନ୍ତି ।
ତେବେ କୁଲେଇ ଗାଁର ଚାଷୀ ମାନଙ୍କ ମୁଖ୍ୟ ଅର୍ଥକରୀ ଫସଲ ହେଉଛି କୋବି । ଗାଁରେ ପ୍ରାୟ ୧୦୦ରୁ ଅଧିକ ପରିବାର ବସବାସ କରନ୍ତି । ଧାନ ବ୍ୟତୀତ ସେମାନଙ୍କର ମୁଖ୍ୟ ଚାଷ ହେଉଛି ଫୁଲ କୋବି। ଫୁଲ କୋବି ଚାଷରେ କୁଲେଇ ଗାଁ କେବଳ ଅନୁଗୋଳ କାହିଁକି ସାରା ରାଜ୍ୟରେ ବେଶ ଜଣାଶୁଣା । କାରଣ ଏଠାରୁ ରାଜ୍ୟର ବିଭିନ୍ନ ସ୍ଥାନକୁ କୋବି ଚାଲାଣ ହୁଏ । ଏଠାରେ ଲୋକେ ନିଜସ୍ୱ ଜ୍ଞାନ କୌଶଳରେ ବର୍ଷକୁ ୩ରୁ ୪ ଥର ଫୁଲ କୋବି ଉତ୍ପାଦନ କରନ୍ତି । ଏହି ଚାଷରୁ ସେମାନେ ପରିବାର ପ୍ରତିପୋଷଣ କରନ୍ତି,ଚଳିତ ବର୍ଷ ଟଙ୍କାଟିଏ ରୋଜଗାର ନାହିଁ, ଓଲଟା ଅଧିକ ଖର୍ଚ୍ଚ ହୋଇଛି । ଏତେବେଳକୁ ଗାଁରେ ବେପାରୀଙ୍କ ଗାଡିର ସୁଅ ଛୁଟି ଥାନ୍ତା । ବସ୍ତା ବସ୍ତା କୋବି ବୋଝେଇ ହୋଇ ବାହାରକୁ ପଠାଯାଇଥାନ୍ତା । ହେଲେ ବର୍ଷା ପାଣିରେ ସବୁ ସ୍ବପ୍ନ ପରିଶ୍ରମ ଧୋଇ ଧୂଳିସାତ୍ ହୋଇଯାଇଛି ।
ଯଦି ସରକାରଙ୍କ ତରଫରୁ ଏହାର ଆକଳନ କରି କିଛି ସହାୟତା ଦିଆଯା'ନ୍ତା ତେବେ ଚାଷୀ ପୁଣି ଅଣ୍ଟା ସଳଖିପାରିବେ ବୋଲି କହିଛନ୍ତି ।
ଏବେ ଚାଷୀ ୩ୟ ଥର ଚାରା ଲଗାଇବାକୁ ପ୍ରସ୍ତୁତ ହେଉଛନ୍ତି । କିନ୍ତୁ ଆଗକୁ ପୁଣି ଏକ ଲଘୁଚାପ ଆଶଙ୍କା ଥିବାରୁ ସେମାନଙ୍କ ଚିନ୍ତା ବଢିଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ ଇଟିଭି ଭାରତ
